ABŞ-ın Milli Xərçəng Araşdırmaları İnstitutunun alimləri müəyyən ediblər ki, statinlərin (qanda aşağı sıxlıqlı lipoprotein xolesterinin səviyyəsini tənzimləməyə kömək edən dərmanlar) istifadəsi qaraciyər xərçənginin inkişaf riskini 35% azaltmaqla əlaqələndirilir. 

HİT.az xəbər verir ki, araşdırmanın nəticələri “Cancer” jurnalında dərc olunub.

Tədqiqatda qaraciyər xərçəngi olan 3719 insan və nəzarət qrupuna birləşdirilən 14876 sağlam könüllü iştirak edib. Tədqiqatçılar iştirakçıların sağlamlıq vəziyyətini və dərman reseptlərini qiymətləndirmək üçün onların tibbi qeydlərindən alınan məlumatları təhlil ediblər. Nəticələr göstərib ki, aşağı sıxlıqlı lipoprotein xolesterinin səviyyəsinin dərman vasitəsi ilə induksiya edilən azalması qaraciyər xərçəngi riskinin azalması ilə əlaqələndirilir.

Xüsusilə, xolesterol udma inhibitorları bu xəstəliyin ehtimalını 31%, statinlər isə 35% azaldır. Digər dərmanlar (fibratlar, omeqa-3 yağ turşuları və niasin) bu qoruyucu təsir göstərməyib.

Tədqiqatçılar statinlərin antiinflamatuar xüsusiyyətlərinin xərçəng riskini azaltmaqda mühüm rol oynaya biləcəyini irəli sürüb. Bununla belə, bu əlaqəni təsdiqləmək və statinlərin təsir mexanizmlərini daha yaxşı başa düşmək üçün daha geniş tədqiqatlara ehtiyac var.

Samir