Qışda bir çox insan quru dəri problemi ilə üzləşir. Aşağı temperatur və aşağı hava rütubəti onun vəziyyətinə mənfi təsir göstərə bilər.

Hit.az xəbər verir ki, dermatoloq və trixoloqu Sofiya Belaş Gazeta.Ru-ya qışda dərinin quruması səbəbləri və bunun qarşısının alınması yolları barədə danışıb.

Həkim aşağıdakı səbəbləri sıralayıb: aşağı temperaturun təsiri, daxili istilik, əlverişsiz hava faktorları (günəş işığı və külək), düzgün olmayan dəriyə qulluq.

Buna əsaslanaraq, həkim qışda dərinin soyulmasının qarşısını almağa kömək edəcək məsləhətlər verib:

"Otağı nəmləndirin. Rütubət səviyyəsini artırmaq üçün evinizdə nəmləndirici quraşdırın. Bu, dərinin səthindən nəmin sürətlə buxarlanmasının qarşısını almağa və onun ümumi vəziyyətini yaxşılaşdırmağa kömək edəcək".

O deyir ki, düzgün kosmetika seçmək eyni dərəcədə vacibdir: tərkibində hialuron turşusu, qliserin və yağlar (məsələn, şi yağı və ya kokos yağı) olan nəmləndirici kremlərdən istifadə edin. Bu komponentlər dəridə nəm saxlamağa və onun qoruyucu funksiyalarını bərpa etməyə kömək edir.

“Mütəmadi olaraq peeling etməyi unutmayın. Zərif aşındırma ölü dəri hüceyrələrini çıxarmağa kömək edəcək, nəmləndiricilərin daha dərinə nüfuz etməsinə və daha effektiv işləməsinə imkan verəcəkdir. Lakin bu, dərini zədələməmək üçün ehtiyatla edilməlidir”, deyə Belaş əlavə edib.

O, kifayət qədər maye qəbul etməyin vacibliyinə də diqqət çəkib:

“Su balansınıza diqqət yetirin. Dərinizi içəridən nəmləndirmək üçün kifayət qədər su içmək vacibdir. Qış aylarında maye qəbulunu artırmağa dəyər, çünki qışda biz çox vaxt orqanizmin nəm itirdiyini hiss etmirik”.

Dərini xarici təsirlərdən qorumaq üçün həkim dodaq balzamları və üz və əl kremləri kimi qoruyucu vasitələrdən istifadə etməyi məsləhət görüb. Onlar dərinin bu sahələrini soyuq havadan və küləkdən qorumağa kömək edəcəklər.

“Qışda dəri quruluğu aşağı temperatur, istilik və düzgün qulluq edilməməsi nəticəsində yaranan ümumi problemdir. Bununla belə, bəzi tədbirlər görərək, cildinizin vəziyyətini əhəmiyyətli dərəcədə yaxşılaşdıra və qışın mənfi təsirlərini minimuma endirə bilərsiniz. Unutmayın ki, dəriyə qulluq onun sağlamlığına sərmayədir və qışda bu, xüsusi diqqət tələb edir. Dəriniz daim qurudursa, diaqnozu dəqiqləşdirmək və optimal terapiya seçmək üçün dermatoloqa müraciət etmək daha yaxşıdır”, deyə həkim yekunlaşdırıb.

Samir