Türkiyədən olan alimlər müəyyən ediblər ki, həssas narsisizm – özünəinamın aşağı olması və tənqidə qarşı həssaslıqla xarakterizə olunan narsisizm forması – kişilərdə əzələ dismorfiya pozuntusunun inkişafına şərait yarada bilər. Lakin bu prosesdə əsas rolu perfektsionizm oynayır: məhz əlçatmaz fiziki ideal uğrunda səy, həssas narsisizmlə əzələ dismorfiyası riski arasındakı əlaqəni gücləndirir. 

HİT.az xəbər verir ki, tədqiqatın nəticələri "Clinical Neuropsychiatry" (CN) jurnalında dərc olunub.

Əzələ dismorfiyası və ya "tərs anoreksiya" insanın artıq kifayət qədər əzələli olsa belə, daha çox əzələ inkişafına obsesiv şəkildə can atdığı vəziyyətdir. Bu cür insanlar üçün aludəedici məşqlər, sərt pəhrizlər və bəzən anabolik steroidlərdən istifadə xarakterikdir.

Araşdırma çərçivəsində alimlər müntəzəm olaraq idman zalına gedən 135 kişi arasında sorğu keçiriblər. İştirakçılar narsisizm, perfektsionizm və əzələ dismorfiyasına meyillilik səviyyəsini qiymətləndirən anketlər doldurublar. Məlumatların təhlili göstərib ki, yüksək həssas narsisizmə sahib kişilər daha çox perfektsionist yanaşmalar nümayiş etdirir və bu da onların əzələ dismorfiyasına tutulma riskini artırır.

Eyni zamanda, perfektsionizm vasitəçi rolunu oynayır: həssas narsisizmin əzələ dismorfiyası ilə birbaşa əlaqəsi olsa da, perfektsionizm səviyyəsi nəzərə alındıqda bu əlaqə zəifləyir. Bu da o deməkdir ki, məhz bədənlə bağlı perfektsionist ideal axtarışı həssas narsisizmə malik kişiləri əzələ dismorfiyasına qarşı daha həssas edir.

Tədqiqat həmçinin müəyyən edib ki, iştirakçıların 37,8%-i bu pozuntunun inkişafı baxımından yüksək risk daşıyır. Bu kişilər daha çox məşq edir, lakin yarışlarda daha az iştirak edir, daha çox qida qəbul edir və qida əlavələri ilə steroidlərdən istifadəyə daha çox meyilli olurlar.

Tədqiqat müəllifləri vurğulayırlar ki, əzələ dismorfiyası ilə mübarizə üçün terapiya yanaşmaları mütləq şəkildə perfektsionist düşüncə tərzini nəzərə almalı və kişilərə ideal bədən uğrunda səylərinin həm əlçatmaz, həm də dağıdıcı ola biləcəyini başa salmalıdır.

Samir