ABŞ-ın Kaliforniya Universitetinin alimləri müəyyən ediblər ki, elektron siqaretlərdən istifadə HİV-ə yoluxmuş insanlar üçün adi siqaret çəkməkdən daha təhlükəsiz ola bilər. 

HİT.az xəbər verir ki, araşdırma "Journal of the American Heart Association" (JAHA) jurnalında dərc olunub.

Tədqiqatçılar aterogenezin erkən mərhələlərini - damarlarda yağ və xolesterinin yığılması prosesini tədqiq ediblər və müəyyənləşdiriblər ki, elektron siqaretlər tütün siqaretinə nisbətən prosesi təşviq edən daha az dəyişikliklərə səbəb olur.

David Geffen Tibb Məktəbində kardioloq və tibb və fiziologiya professoru, aparıcı tədqiqat müəllifi Dr. Holly Middlekoff deyib: "Tütün çəkmə ABŞ-da qarşısı alına bilən ürək-damar xəstəliklərindən ölüm hallarının əsas səbəbi olaraq qalır. HİV/QİÇS-lə yaşayan insanlar ümumi əhaliyə nisbətən iki-üç dəfə daha çox siqaret çəkirlər ki, bu da ürək-damar ağırlaşmalarının riskini artırır. Nəticələrimiz göstərir ki, elektron siqaretə keçid bu həssas qrup üçün təsirli zərərin azaldılması strategiyası ola bilər".

Təcrübədə 21-60 yaş arası HİV-ə yoluxmuş, müntəzəm olaraq tütün çəkən insanlar iştirak edib. Üç gün ərzində iştirakçılar təsadüfi olaraq tütün siqareti çəkmək, elektron siqaretdən istifadə etmək və ya boş borudan üfürmək üçün təyin edilib. Hər seansdan əvvəl və sonra alimlər ürək-damar sisteminə təsirləri qiymətləndirmək üçün qan nümunələri və elektrokardioqramlar götürüblər. Tütün siqareti aterogenezin inkişafına ən çox mənfi təsir göstərib.

Tədqiqatın müəllifləri deyirlər ki, tapıntılar HİV-ə yoluxmuş insanlarda elektron siqaretdən istifadə ilə bağlı ürək-damar risklərini araşdırmaq üçün daha geniş klinik sınaqlara ehtiyac olduğunu göstərir:

"Elektron siqaretə keçid HİV-ə yoluxmuş insanlarda infarkt riskini azaltmaqla nikotin asılılığını təmin etməyə kömək edərsə, bu, siqaret çəkmə üçün zərərin azaldılması strategiyasında mühüm addım olardı".

Samir