"Metroların qarşılarında və ya insanların sıx toplaşdığı yerlərdə dönərlə yanaşı, qamburger və ya hotdoqlar da satılır".
Bu sözləri qida məsələləri üzrə ekspert İlkin Şirinov Hit.az-a açıqlamasında deyib.
O təəssüflə bildirib ki, insanlar da bu zərərli məhsulları alıb yeyirlər:
"Əslində, hər zaman mənşəyi məlum olmayan dönərlərin, qamburgerlərin və ya hotdoqların ziyanından danışırıq. Lakin nədənsə insanlar hələ də bu cür məhsulları almağa davam edirlər. Hərçənd ki, bu məhsullar gigiyenik qaydaların kobud şəkildə pozulduğu yerlərdə hazırlanır və satılır. İnsanlar isə onları almaqla sağlamlıqlarını bilərəkdən riskə atırlar.
Ancaq nəzərə almaq lazımdır ki, sözügedən məhsulların mənşəyi məlum deyil. Onlarda istifadə olunan ətlər barədə baytarlıq kağızı yoxdur. Hətta qida təhlükəsizliyi sertifikatı olmadan dönər, qamburger və ya hotqod kimi məhsullar satılır. Alıcılar da sanki bunları bilməmiş kimi davranırlar. Bu isə onların öz sağlamlıqlarına biganə olduqlarını göstərir".
Mütəxəssis sözügedən məhsulların çox böyük hissəsinin antisanitar vəziyyətdə hazırlanmasını bir daha diqqətə çatdırıb:
"Hətta bu cür məhsulları içində istifadə olunan qidaların heç biri düzgün saxlanırmır. Bəlkə də, monitorinq aparılsa görərik ki, həmin yerlərdəki dönərçilərin əllərini yumaq üçün su belə yoxdur. Çoxunda soyuducu da olmur.
Üstəlik, axşamdan qalan bişmiş dönərlər və ya hazırlanmış qamburgerlərin yenidən emala gedib-getmədiyi də sual altındadır. Həmçinin, dönərçinin tibbi müayinədən keçib keçməməsi də bəlli deyil. Bütün bunlar isə araşdırılmalıdır".
İlkin Şirinov diqqətə çatdırıb ki, satış qiyməti maya dəyərindən aşağı satılan məhsullar təhlükəlidir:
"Necə olur ki, dönər, qamburger və ya hotdoqların maya dəyəri satış qiymətindən daha baha çıxır? Onların tərkibi nədəndir? Məsələn, toyuq ətinin 1 kiloqramı 5-6 manata müştərilərə təklif olunur. Bəs 1 manata satılan dönər və ya qamburger nə ətindəndir? Bunlar hansı məhsullardan hazırlanır? Bütün bunlar çox şübhəlidir.
Mən istehlakçıları sağlamlıqlarının qeydinə qalmağa çağırıram. Toz-torpağın içində satılan üzərinə ətdən hazırlanan dönəri və ya qamburgeri görə-görə almaq bəzi insanların sağlamlıqlarına biganə yanaşdığından xəbər verir".
Pərviz
