Sidney Universitetinin alimləri uzun müddət tənhalıq hiss etdiyini bildirən qadınların erkən ölüm riskinin 15% artdığını müəyyən ediblər. 

HİT.az xəbər verir ki, araşdırmanın nəticələri "BMJ Medicine" jurnalında dərc olunub.

Araşdırmada 48-55 yaş arası 57 min qadın iştirak edib. İlk mərhələdə elm adamları subyektlərin psixi sağlamlığı və sosial həyatı ilə bağlı məlumatlar toplayıb, sonra isə müşahidələrə başlayıblar. 15 il ərzində tədqiqatçılar könüllülər arasında bütün ölümləri qeydə alıblar.

Əlavə təhlillər göstərib ki, 15 il ərzində heç vaxt tənhalıqdan "şikayət etməyən" qadınların ölüm riski 5% təşkil edir. Bununla belə, müntəzəm olaraq tənha hiss edən iştirakçılar üçün həyatlarını vaxtından əvvəl bitirmə ehtimalı 3 dəfə artaraq 15%-ə çatıb.

Tədqiqat həmçinin tənhalıq hisslərinin müddəti ilə ölüm riski arasında əlaqə tapıb. Alimlər müəyyən ediblər ki, qadınlar nə qədər tənha hiss edirlərsə, ömürlərinin qısalması ehtimalı da bir o qədər yüksək olur.

"Orta yaşda qadınlar menopoz, təqaüdə çıxmaq və uşaqların evdən getməsi kimi böyük fiziki, psixoloji və sosial dəyişikliklərlə daha çox qarşılaşırlar. Bütün bunlar qadının özünü sosial cəhətdən aktiv hiss etməsinə təsir edə bilər", deyə alimlər izah ediblər.

Tədqiqatçılar əlavə edib ki, tənhalıq uzun müddətdir ürək-damar xəstəlikləri, diabet və depressiya da daxil olmaqla müxtəlif mənfi sağlamlıq nəticələri ilə əlaqələndirilir.

Samir