Danimarka alimləri belə qənaətə gəliblər ki, respirator sinsitial virus (RSV) ilə kəskin infeksiyaya yoluxmuş böyüklər bir il ərzində əhalinin qalan hissəsinə nisbətən 2,7 dəfə çox ölürlər. 

HİT.az xəbər verir ki, tədqiqat Avropa Klinik Mikrobiologiya və Yoluxucu Xəstəliklər Cəmiyyətinin (ESCMID) illik konfransında təqdim olunub.

RSV tənəffüs yollarını yoluxduran ümumi bir tənəffüs virusudur. Xüsusilə körpələr, yaşlılar və xroniki obstruktiv ağciyər xəstəliyi (KOAH), astma və immun çatışmazlığı olan insanlar üçün təhlükəlidir.

Mütəxəssislər 2011-2022-ci illərdə RSV infeksiyasına yoluxmuş 5289 böyüklərin məlumatlarını təhlil edərək onları 15867 sağlam insanla müqayisə ediblər. Məlum olub ki, infeksiyadan sonra bir il ərzində belə xəstələrdə KOAH-ın kəskinləşməsi 3,1 dəfə, astmanın kəskinləşməsi isə 4,6 dəfə çox olub.

Bundan əlavə, xəstələrin 57%-i xəstəxanaya yerləşdirilməli idi (nəzarət qrupunda 28%-ə qarşı), 5,3%-i isə reanimasiyaya yerləşdirilib (1,4%-ə qarşı).

Mütəxəssislər, KOAH və astma xəstələri də daxil olmaqla, risk qrupları üçün peyvəndin vacibliyini vurğulayırlar.

RSV əvvəllər ilk növbədə uşaqlıq infeksiyası hesab olunurdu, lakin yeni məlumatlar onun böyüklər, xüsusilə yaşlılar və xroniki xəstələr üçün təhlükəsini təsdiqləyir. Alimlər bu virusun diaqnozu və qarşısının alınmasına daha çox diqqət yetirməyə çağırırlar.

Samir