Çox sayda insan yüksək qan təzyiqindən əziyyət çəkir və bu vəziyyət yaş artdıqca daha da ağırlaşır. 

HİT.az xəbər verir ki, “Earth.com” saytının yazdığına görə, son tədqiqatda alimlər təzyiqin optimal səviyyədə saxlanılması üçün sadə, lakin effektiv strategiyanı müəyyən ediblər. Bu yanaşma həftəlik fiziki aktivliyin dəqiq normaya əsaslanmasını nəzərdə tutur.

Amerikanın Profilaktik Tibb Jurnalında dərc olunan tədqiqatda ABŞ-ın dörd şəhərindən 5100-dən çox yetkin şəxs iştirak edib. Alimlər bu şəxslərin fiziki göstəricilərini uzunmüddətli dövrdə mütəmadi ölçərək və onların məşq rejimlərini izləyərək, davamlı fiziki aktivliyin gələcəkdə qan təzyiqinə necə təsir etdiyini öyrəniblər.

Nəticələr göstərib ki, istənilən yaş mərhələsində daha çox fiziki fəaliyyət göstərən iştirakçılarda qan dövranı göstəriciləri daha yaxşı olub.

Məqalədə qeyd olunur ki, həftədə beş saat orta intensivlikli məşq edən şəxslərdə yüksək qan təzyiqi riski nəzərəçarpacaq dərəcədə azalıb.

Beləliklə, orta intensivlikli fiziki fəaliyyət orqanizmin qan damarlarını və stresslə bağlı hormonları tənzimləməsinə kömək edir. Əldə edilən nəticələr onu da göstərir ki, ürək-damar sağlamlığının qorunması üçün mütəmadi aktivlik, qısa müddətli intensiv məşqlərdən daha effektivdir.

Bu nəticələr digər genişmiqyaslı elmi araşdırmalarla da üst-üstə düşür. Həmin araşdırmalarda göstərilir ki, daha çox orta intensivlikli aerobik fəaliyyət (məsələn, sürətli yerimə və ya velosiped sürmə) xüsusilə risk qrupunda olan şəxslərdə sistolik qan təzyiqinin daha çox azalmasına səbəb olur.

Onların nəticələrinə əsasən, mütəmadi fiziki fəaliyyət sağlam yetkin şəxslərdə sistolik təzyiqi orta hesabla 3,5 mm civə sütunu, həyat tərzi ilə bağlı xəstəliklərdən əziyyət çəkən şəxslərdə isə 5,5 mm civə sütunu qədər azaldır. Bu xəstəliklərə yüksək qan təzyiqi də daxildir.

Səhiyyə sahəsindəki tövsiyələrə görə, böyüklərə həftədə azı 150 dəqiqə orta intensivlikli fiziki fəaliyyət tövsiyə olunur. Lakin bu araşdırma göstərir ki, bu həddin üzərinə çıxmaq əlavə faydalar təmin edir.

Qeyd edək ki, daha əvvəl həkimlər qan təzyiqini aşağı salmaq üçün qəbul edilməsi tövsiyə olunan 7 məhsulun adını açıqlayıblar.

Samir