Yeni araşdırmaya görə, yüksək qan təzyiqini azaltmağa yönəlmiş intensiv tədbirlər ürək-damar sağlamlığı üçün mühüm faydalar verə bilər. Hipertoniya dünyada 30–79 yaş arasında təxminən 1,28 milyard insanı təsir edən geniş yayılmış sağlamlıq problemidir. Müalicə olunmadıqda ürək xəstəliklərinə, insulta və böyrək zədələnməsinə səbəb ola bilər.

HİT.az xəbər verir ki, həkimlər adətən hipertoniya xəstələrinə dərman qəbul etməyi, həmçinin qan təzyiqini 140 mm civə sütununun (mmHg) ətrafında saxlamaq üçün sağlam qidalanma və müntəzəm idman kimi həyat tərzi dəyişiklikləri etməyi məsləhət görürlər.

"The Lancet" tibb jurnalında dərc olunan yeni tədqiqat, sistolik qan təzyiqini 120–130 mmHg-dən aşağı salmağı hədəfləyən intensiv nəzarətin ürək tutması, insult və digər ciddi ürək-damar problemlərinin riskini azalda biləcəyini göstərib.

Çin, Kanada və ABŞ-da aparılan altı klinik sınaqda iştirak edən təxminən 80 min nəfərin məlumatları analiz edilib. Araşdırmada dərman müalicəsi ilə yanaşı, arıqlama və siqareti buraxma kimi həyat tərzi dəyişikliklərini də tətbiq edən intensiv müalicə qrupunda ürək-damar xəstəlikləri və ölüm riskinin əhəmiyyətli dərəcədə azaldığı ortaya çıxıb.

Bununla yanaşı, intensiv müalicə qrupunda başgicəllənmə, huşunu itirmə, böyrək problemləri və ürək ritmində pozğunluqlar kimi yan təsirlərə daha çox rast gəlinib.

Tədqiqatçılar nəticələrin "xalis fayda" göstərdiyini vurğulasalar da, həkimlərə hər bir xəstənin fərdi vəziyyətini nəzərə alaraq balanslı yanaşma təklif edirlər. Alimlərin fikrincə, həm həddindən artıq, həm də yetersiz müalicədən qaçmaq üçün fərdiləşdirilmiş strategiyalar böyük əhəmiyyət daşıyır.

Samir