Ağciyər fibrozu qanda oksigen səviyyəsinin sistematik azalması səbəbindən görmə pozğunluğuna səbəb ola bilər. 

HİT.az xəbər verir ki, bu barədə "Daily Mail"ə oftalmoloq Stiven Hannan (Qlazqo Kaledoniya Universiteti) məlumat verib.

Mütəxəssis izah edib ki, ağciyər fibrozu normal, funksional ağciyər toxumasının birləşdirici toxuma ilə əvəz olunduğu patoloji prosesdir. Çapıq toxumasının əmələ gəlməsinə pnevmoniya, bronxit, KOAH, vərəm, çirkli havanın inhalyasiyası, otoimmün xəstəliklər və ağır koronavirus infeksiyası səbəb ola bilər.

"Ağciyər toxuması zədələndikdə tənəffüs çətinləşir və qana daxil olan oksigenin miqdarı azalır. Belə oksigen aclığı nəinki nəfəs darlığı, öskürək, yorğunluq və halsızlığa səbəb olur, həm də göz sağlamlığına zərər verir", deyə Doktor Hannan izah edib.

Həkimin sözlərinə görə, oksigenlə doymanın sistemli şəkildə azalması tor qişanın və görmə sinirinin fəaliyyətini pozur, bu da zaman keçdikcə görmə qabiliyyətinin pisləşməsinə səbəb ola bilər.

"Ağciyər fibrozunun yaratdığı görmə dəyişiklikləri ağır hallarda bulanıq görmədən tutmuş tor qişanın zədələnməsinə qədər dəyişə bilər. Orqanizmdə oksigen çatışmazlığı da gözlərdəki qan damarlarında görünən dəyişikliklərə səbəb ola bilər: onlar daha nəzərə çarpan və tündləşə bilər", deyə oftalmoloq xəbərdarlıq edib.

Həkim əlavə edib ki, ağciyər fibrozunun kortikosteroidlərlə müalicəsi gözün linzasının bulanıqlaşdığı göz xəstəliyi olan kataraktın inkişaf riskini artıra bilər.

"Ağciyər fibrozu olan insanlar mütəmadi olaraq oftalmoloq tərəfindən müayinə olunmalıdırlar. Oksigen səviyyəsini izləmək, maye balansını saxlamaq və nəmləndirici damcılarla quru göz simptomlarını aradan qaldırmaq da görmə qabiliyyətini qorumağa kömək edə bilər", deyə ekspert yekunlaşdırıb.

Samir