Alimlər müəyyən etdilər ki, yaşıl çay orqanizmin yağ yandırmasına və qan şəkərinin səviyyəsini tənzimləməsinə kömək edə bilər. Piylı siçovullarla aparılan tədqiqatda onun maddələr mübadiləsini və əzələ sağlamlığını yaxşılaşdırdığı, arıq heyvanlara isə zərər vermədiyi müşahidə edilib.

HİT.az xəbər verir ki, bununla bağlı "ScienceDaily" portalı "Cell Biochemistry & Function" jurnalında dərc olunmuş tədqiqata istinadən məlumat yayıb.

Piylənməyə təsiri

"Piylənmədə yaşıl çayın təsirini öyrənmək üçün tədqiqat qrupu dörd həftə ərzində siçovulları yağla zəngin yüksək kalorili pəhriz və qərb pəhrizini təqlid edən "kafeteriya pəhrizi" ilə qidalandırır", deyə tədqiqatın rəhbəri Rozmari Otton danışıb.

Bu ilkin mərhələdən sonra heyvanlar yaşıl çayla bağlı təcrübədən daha 12 həftə keçiriblər. Bu müddət ərzində onlar yüksək kalorili pəhrizə davam ediblər, lakin onların bəzilərinə standartlaşdırılmış yaşıl çay ekstraktından bədən çəkisi kiloqramına 500 mq dozada mədəaltından verilməyə başlanıb. Bu miqdar insan üçün təxminən gündə 3 qram yaşıl çay, yaxud üç fincan çayın istehlakına bərabərdir.

Çəki itkisi

Avqust 2022-ci ildə "European Journal of Nutrition" jurnalında dərc olunmuş əvvəlki bir tədqiqat göstərib ki, yaşıl çay verilən piylı siçovullarda bədən çəkisinin 30%-ə qədər azalması müşahidə olunub. "Əgər insan bədən çəkisinin 5%-dən 10%-nə qədər itirirsə, bu artıq çox şey deməkdir. Buna görə də heyvanlar üzərində əldə olunan bu nəticə çox vacibdir", deyə professor qeyd edir.

Əzələ toxumasına təsiri

Son tədqiqatın başqa bir mühüm məqamı əzələ morfologiyasının qorunub saxlanılması olub. Piylənmə adətən əzələ liflərinin diametrinin azalmasına səbəb olur, lakin yaşıl çay əzələ atrofiyasının qarşısını alıb.

Eyni zamanda, Ottonun sözlərinə görə, yaşıl çayın arıq heyvanların çəkisinə təsir etmədiyinə dair məlumatlar var. "O, kök heyvanlarda çəki itkisini təşviq edir, lakin arıqlarda balanslaşdırılmış çəkiyə kömək edir. Bu, göstərir ki, çayın təsir göstərməsi üçün, ehtimal ki, qida maddələrinin artıqlığı olan bir mühit lazımdır", deyə o bildirib.

Həqiqi həyatda təsirləri

Siçovullar üzərində aparılan tədqiqatın ümidverici nəticələrinə baxmayaraq, Otton qeyd edir ki, insan üçün hazırda yaşıl çayın təhlükəsiz və təsirli dozasını müəyyən etmək hələ mümkün deyil.

"İdeal olan, davamlı istehlakdır, bunu biz Asiya ölkələrində görürük. Məsələn, Yaponiyada insanlar bütün ömürləri boyu hər gün yaşıl çay içirlər və orada piylənmə səviyyəsi aşağıdır", deyə o qeyd edib.

Samir