Yaşıl çay orqanizmdəki iltihabı azaltmaq qabiliyyəti sayəsində sağlamlıq üçün faydalıdır. Lakin bu, onun yeganə üstünlüyü deyil.
Hit.az xəbər verir ki, "Frontiers in Public Health" jurnalında dərc olunan yeni tədqiqat göstərib ki, yaşıl çayın iltihabəleyhinə təsiri həm də psixi sağlamlığa müsbət təsir edir.
Tədqiqatçılar aşkar ediblər ki, yaşıl çayın uzunmüddətli istifadəsi orta və yaşlı kişilərdə bədən kütlə indeksinin azalmasına, testosteron səviyyəsinin yüksəlməsinə və yuxunun keyfiyyətinin yaxşılaşması ilə əlaqədar depressiya riskinin azalmasına kömək edir. Qadınlar da bu faydalardan yararlanırlar: əlavə tədqiqatlar göstərib ki, yaşıl çayın müntəzəm qəbulu iltihabı azaltmaqla və estrogenin ən geniş yayılmış forması olan estradiol səviyyəsini artırmaqla depressiya riskini azaldır.
Tibb elmləri doktoru, sertifikatlı psixiatr Xristina Ni bunu belə izah edir: “İltihab beyin hüceyrələrinin qarşılıqlı təsirini pozur və rifaha cavabdeh olan kimyəvi maddələrin səviyyəsini azaldır. Yaşıl çay orqanizmdəki iltihab reaksiyasını yumşaldaraq, beynin neyron əlaqələrinin fasiləsiz fəaliyyətini təmin edir və həm fiziki, həm də psixi rifah səviyyəsini bərpa edir.”
Xristina Ni əlavə edir ki, yaşıl çay müntəzəm qəbul edildikdə stressi və depressiya əlamətlərini azalda, əhval dəyişkənliyini stabilləşdirə və hətta beyin hüceyrələrini köhnəlmədən qoruya bilər. Bu, çayın beyində sakitlik və rifah hissini təmin edən serotonin və dopamin kimi kimyəvi maddələrin balansını tənzimləməsi, stress hormonlarının səviyyəsini azaltması və neyronları oksidləşmə zədələrindən qoruması ilə izah olunur.
Tədqiqat həmçinin göstərib ki, yaşıl çay sevən insanların beyin həcmi və testosteron səviyyəsi daha yüksək olur – bu iki amil isə yaş artdıqca əhvalın, enerjinin və depressiyaya qarşı davamlılığın qorunması ilə əlaqələndirilir.
Araşdırmaya görə, ən böyük faydanı gündə azı 500 millilitr – təxminən iki standart 230 millilitrlik fincan – yaşıl çay içən və bunu ən azı 20 il ərzində davam etdirən iştirakçılar əldə ediblər.
Əvvəllər aparılan tədqiqatlar da göstərib ki, yaşıl çay orqanizmə piy yandırmaqda və qan şəkərinin səviyyəsini tənzimləməkdə kömək edə bilər.
Samir
