Müasir həyat tərzi rahatlığa üstünlük verir — insanlar qısa məsafələrə avtomobillə gedir, geyim və qidaları onlayn sifariş edir, işdə və istirahət zamanı saatlarla oturaq vəziyyətdə qalırlar. Lakin son tədqiqatlar göstərir ki, hətta qısa bir gəzinti belə orqanizm üçün böyük fayda daşıyır.
HİT.az xəbər verir ki, “Brigham və Women’s Hospital” tibb müəssisəsinin nəzdindəki Massaçusets Universitetinin alimləri 10 ildən çox müddətdə 13 547 qadının (orta yaşı 72) fiziki aktivliyini izləyiblər. Araşdırma göstərib ki, hətta həftədə 1–2 gün 4000 addım atan qadınlarda ölüm riski 26 faiz, ürək-damar xəstəlikləri riski isə 27 faiz azalır. Əgər bu aktivlik həftədə 3 və daha çox gün davam edərsə, ölüm riski 40 faizə qədər enir.
İnsan bədəni hərəkət üçün yaradılıb: texnologiyadan əvvəl insanlar gündə 15–20 min addım atırdılar, indi isə yaşlılar çox vaxt 5000 addımı belə keçmirlər. Bu az hərəkətlilik bədənin xəstəliklərə qarşı müqavimətini və bərpa qabiliyyətini zəiflədir.
Tədqiqatın müəlliflərindən biri olan İ-Min Li qeyd edib ki, bugünkü azhərəkətli həyat tərzi fonunda sağlamlıq üçün minimal fiziki aktivlik həddini müəyyənləşdirmək vacibdir ki, əhali üçün real və əlçatan məqsədlər müəyyən olunsun.
Araşdırma zamanı iştirakçılar 2011–2015-ci illərdə bel hissəsinə akselerometr taxıblar. Qurğu onların bütün gündəlik hərəkətlərini qeydə alıb. Nəticədə məlum olub ki, müntəzəmlikdən çox, ümumi addım sayı önəmlidir. Kimisi hər gün gəzirdi, kimisi isə aktivliyi yalnız istirahət günlərinə salırdı, lakin nəticələr oxşar olub.
Alimlərin fikrincə, 4000 addım bədən üçün bir növ bioloji “oyadıcı” kimi işləyir. Bu həddən az hərəkət orqanizmin bərpa və müdafiə sistemlərinin aktivləşməsinə mane olur.
Azhərəkətlilik əzələlərin zəifləməsinə, balansın pozulmasına və ümumi passivliyə gətirib çıxarır. Lakin hətta nadir gəzintilər belə bu mənfi dövrü poza bilər. Gəzinti qan dövranını yaxşılaşdırır, hüceyrə yenilənməsini və enerji istehsalını stimullaşdırır, orqanizmin qocalma prosesini ləngidir.
Alimlər bildirirlər ki, “daha yaxşı” gəzinti üsulu yoxdur: bəziləri gün ərzində bir neçə qısa gəzintiyə çıxır, digərləri isə uzun məsafə qət edir.
Tədqiqat nəticələrinə görə, ürək-damar sağlamlığı üçün optimal fayda təxminən *5000 addım* səviyyəsində sabitləşir, *7000 addıma* qədər isə ömür uzunluğuna müsbət təsir davam edir. Bu göstəricidən sonra artım sabit qalır.
Nəticə etibarilə, gündə təxminən *5 kilometr* (yəni 7000 addım) gəzinti sağlamlıq üçün maksimum fayda verir — ömrü uzadır və ürək-damar xəstəliklərinin riskini azaldır. Əlbəttə, 10 min və daha çox addım əlavə kalori sərfiyyatı və fiziki dözümlülüyün artmasına da səbəb olur.
Samir
