Hər bir qadın bədən formasına nəzarət etməyə çalışır – bəziləri özünü ağır məşqlərlə, digərləri isə pəhrizlə yükləyir. Lakin daha yumşaq və effektiv bir yol var – evdə sadə fiziki fəaliyyət. 

Hit.az xəbər verir ki, “Eat This, Not That” nəşrinin məlumatına görə, bel ölçüsünü qısa müddətdə azaltmaq üçün xüsusi məşqlər və düzgün qidalanma birgə təsir göstərməlidir.

Sağlam həyat tərzi və fitnes üzrə mütəxəssis, dünya atletika çempionu Kristi Sueydin sözlərinə görə, bədənin mərkəz hissəsini – “core” əzələlərini gücləndirmək çox vacibdir.

“Biz gündəlik həyatda bütün bədənlə hərəkət edirik – əyilirik, çantaları qaldırırıq, uşaqlarla oynayırıq. Buna görə də məşqlər zamanı da bütün əzələlər birgə işləməlidir,” deyə o bildirib.

Ekspert vurğulayıb ki, yalnız lokal olaraq – məsələn, təkcə bel hissəsində – arıqlamaq mümkün deyil. Yağ azalması bədənin bütün hissələrində baş verir. Lakin düzgün seçilmiş hərəkətlər belin vizual incəlməsinə və duruşun yaxşılaşmasına kömək edir.

Belin incəlməsi üçün evdə edilə bilən 4 məşq

1.“Ölü böcək” hərəkəti

Yerdə arxası üstə uzanın, qollarınızı yuxarı qaldırın və dizlərinizi 90 dərəcə bucaq altında bükün. Qarın əzələlərinizi sıxın və eyni anda sağ qolu və sol ayağı yavaşca aşağı endirin, lakin yerə toxundurmayın. Belinizin döşəməyə sıx yapışıq qalmasına diqqət edin. Nəfəs verərək başlanğıc vəziyyətə qayıdın.

2.“Qartal-it” hərəkəti

Dördayaq vəziyyət alın. Sol qolu və sağ ayağı eyni anda irəli uzadın, bir neçə saniyə saxlayın və sonra başlanğıc vəziyyətə qayıdın. Daha sonra sağ qolu və sol ayağı uzadın. Hərəkəti növbə ilə təkrarlayın. Bu məşq bədənin tarazlığını və koordinasiyasını inkişaf etdirir.

3.“Velosiped” və qarın burulmaları

Bu hərəkət bütün qarın əzələlərini işlədir. Arxası üstə uzanın, başınızı əllərinizlə dəstəkləyin və dizlərinizi bükərək ayaqlarınızı yuxarı qaldırın. Çiyinləri bir qədər yerdən qaldırın. Sol dizinizi sağ dirsəyə yaxınlaşdırın, eyni anda sağ ayağı düzləşdirin. Sonra tərəfləri dəyişin və hər iki tərəfi 3 yanaşma üzrə 20 dəfə təkrarlayın.

4.“Körpü” (bridge)

Bu məşq həm qarın, həm də omba əzələlərini gücləndirir. Arxası üstə uzanın, dizlərinizi bükün və dabanlarınızı yerə sıxın. Omba əzələlərini sıxaraq çanağı yuxarı qaldırın. Bir neçə dəfə yuxarı-aşağı hərəkət edin. Daha sonra dizlərin arasına top qoyub sıxın və eyni hərəkəti təkrarlayın. İrəliləmiş mərhələdə isə hər dəfə bir ayağı yuxarı qaldıraraq məşqi çətinləşdirə bilərsiniz.

Bu sadə məşqlər düzgün və davamlı şəkildə yerinə yetirildikdə, bədənin mərkəz əzələlərini gücləndirir, duruşu düzəldir və belin formasını incəldir.

Samir