Hər səhər əlavə vaxt sərf etməmək üçün eyni yeməyi seçirsinizsə - bunu tamamilə düzgün edirsiniz. 

HİT.az-ın məlmatına görə, "RealSimple" yazır ki, sağlamlıq üzrə mütəxəssislər belə sabitliyin zehni enerjini qorumağa və gün ərzində daha sabit qidalanmaya kömək etdiyini bildirirlər. Təbii ki, bir vacib şərt var: səhər yeməyiniz balanslaşdırılmış olmalıdır.

"Beynimiz hərəkətləri avtomatlaşdırmağı sevir, buna görə də hər gün eyni səhər yeməyini yemək vərdişlərin formalaşması prosesinə birbaşa təsir edə bilər”, deyə sertifikatlaşdırılmış həkim Steysi Haymburqer bildirir.

Eyni səhər yeməyinin əsas üstünlükləri

1. Qərarvermə yorğunluğunu azaldır

Qərarvermə qaçılmaz olaraq zehni enerji tələb edir, buna görə “standart” səhər yeməyi kiçik, lakin davamlı bir yükü aradan qaldıra bilər. "Biz hər gün minlərlə qərar veririk və onların çoxu qida ilə bağlıdır. Gün ərzində daha az qida seçimi etmək başqa düşüncələr üçün yer saxlayır", deyə qidalanma üzrə məsləhətçi Keyt Layman qeyd edir.

Tədqiqatlar göstərir ki, uzun qərarlar zəncirindən sonra özünüidarəetmə, diqqət və işi sona çatdırma qabiliyyəti adətən zəifləyir.

2. Gündəlik rejimi sadələşdirir

"Ərzaq alınması daha asan olur, onlayn sifarişlər avtomatikləşir. Eyni məhsulları mütəmadi istifadə etmək yemək hazırlığına və təmizliyə sərf olunan vaxtı da azaldır", deyə doktor Haymburqer vurğulayır.

3. Sağlam vərdiş formalaşdırmağa kömək edir

Hər gün eyni səhər yeməyini yedikdə, xüsusilə stress zamanı onun daim faydalı qalmasına nəzarət etmək daha asan olur.

Bir araşdırmada qeyd olunur ki, müntəzəm səhər yeməyi ürək-damar xəstəlikləri, 2-ci tip diabet və metabolik sindrom riskini azaldır, səhər yeməyini hətta həftədə bir dəfə belə buraxmaq bu üstünlükləri xeyli zəiflədə bilər.

Eyni səhər yeməyinin çatışmazlıqları

İki mümkün çatışmazlıq gələcəkdə problem yarada bilər.

“Əgər səhər yeməyiniz hər gün eynidirsə, yeməkdən aldığınız zövq azala bilər. Biz bilirik ki, qidadan zövq almaq davamlı vərdişlərin ayrılmaz hissəsidir”, deyə Layman bildirir.

İkinci çatışmazlıq isə daha çox qidanın tərkibi ilə bağlıdır.

“Gündəlik olaraq dəyişməyən eyni yeməkləri qəbul edirsinizsə, bəzi qida maddələrinin çatışmazlığı yarana bilər”, deyə Layman əlavə edir. Bu halda, hər həftə bir neçə inqrediyentin dəyişdirilməsi həm qida çatışmazlığını aradan qaldıra, həm də sabit səhər yeməyinin rahatlığını qoruyub saxlaya bilər.

Səhər yeməyinizin faydalı olduğuna necə əmin olmaq olar

“Tədqiqatlarımız bir şeyi aydın göstərir: əgər hər gün eyni səhər yeməyini yeməyə qərar vermisinizsə, o, qida maddələri ilə zəngin və aşağı qlisemik indeksli olmalıdır. Belə yeməklər idrak funksiyalarını, yaddaşı və diqqəti yaxşılaşdırır", deyə doktor Haymburqer vurğulayır.

Nümunə olaraq tərəvəzli yumurta qarışığı, çia toxumu və qoz yağı ilə yulaf sıyığı və ya kətan toxumlu yüksək zülallı giləmeyvə smuzisi göstərilir.

Samir