Britaniyalı alimlər tünd şokoladdakı kimyəvi maddə ilə insanın bioloji qocalmasının yavaşlama əlamətləri arasında əlaqə tapıblar.

HİT.az xəbər verir ki, bu barədə "Euronews" yazıb.

Yeni bir araşdırma tünd şokoladda olan teobrominin insanın qocalmasını yavaşladan xüsusiyyətlərə malik ola biləcəyini göstərib.

"Tədqiqatımız tünd şokoladın əsas komponenti ilə daha uzun müddət gənc qalmaq arasında əlaqəni ortaya qoyur. İnsanların daha çox tünd şokolad yeməli olduğunu deməsək də, bu tədqiqat gündəlik qidaların daha sağlam və daha uzun ömür sürməyimizə necə kömək edə biləcəyini anlamağımıza kömək edə bilər", deyə tədqiqatın baş müəllifi və London Kral Kollecinin epigenomika tədqiqat qrupunun rəhbəri Cordana Bell bildirib.

Qeyd olunur ki, alimlər tədqiqatda Böyük Britaniyada 509, Almaniyada isə 1160 iştirakçı üzərində sınaq keçiriblər və qanında teobrominin səviyyəsi daha yüksək olanların bioloji yaşının faktiki yaşlarından daha aşağı olduğunu aşkar ediblər. Bioloji yaş bədənin faktiki fiziki vəziyyətinin və qocalma sürətinin ölçüsüdür.

Tədqiqatçılar iştirakçıların bioloji yaşını onların DNT-sindəki kimyəvi dəyişiklikləri araşdıraraq və telomerlərinin uzunluğunu qiymətləndirərək müəyyən ediblər.

Tünd şokolad əvvəllər ürək sağlamlığı da daxil olmaqla, digər mümkün sağlamlıq faydaları ilə əlaqələndirilirdi. Bununla belə, alimlər teobromin və yaşlanma arasındakı əlaqəni tam anlamaq üçün daha çox tədqiqata ehtiyac olduğunu qeyd edirlər.

"Tədqiqat maraqlı bir əlaqəni araşdırsa da, daha çox və ya az şokolad yemək səbəbindən teobromin səviyyəsinin dəyişdikdə nə baş verdiyini və bunun sağlamlığımıza necə təsir etdiyini bizə demir", deyə tədqiqatda iştirak etməyən Oksford Universitetinin Qidalanma, Piylənmə və Davranış Elmləri kafedrasının dosenti Dimitrios Koutoukidis bildirib.

Samir