Sağlam qocalma prosesində mühüm rol oynayan və xüsusilə 50 yaşdan yuxarı insanlar üçün daha çox diqqətə layiq olan bir mineral var.

Hit.az xəbər verir ki, "Parade” nəşrinin yazdığına görə, diyetoloqlar 50 yaşdan sonra kifayət qədər qəbul edilməli olan mineralın maqnezium olduğunu bildiriblər.

Maqnezium sümüklərin sağlamlığı, qanda şəkərin səviyyəsinə nəzarət, ürək-damar sistemi daxil olmaqla bir çox proses üçün vacibdir. Yaş artdıqca onun optimal səviyyədə saxlanılması daha da önəmli olur.

“Araşdırmalar 50 yaşdan yuxarı insanlar üçün maqneziumun çoxsaylı faydalarını göstərib. Bunlara qocalıq zəifliyinin riskinin azalması, əzələ funksiyasının yaxşılaşması, koqnitiv pozuntuların riskinin azalması, sümüklərin sağlamlığının qorunması və yuxu keyfiyyətinin yaxşılaşması daxildir”, deyə diyetoloq Vanessa İmus bildirib.

Maqneziumun əsas faydaları

Ürək-damar sağlamlığı: Maqneziumu çox qəbul edən insanlarda ürəyin işemik xəstəliyi və insult riskinin daha aşağı ola biləcəyi qeyd olunur.

Osteoporoz: Maqneziumun daha yüksək qəbulu sümüklərin mineral sıxlığının yaxşı olması ilə əlaqələndirilir. Tədqiqatlar göstərib ki, maqnezium qəbulu sınıq riskini 27 faizə qədər azalda bilər.

Zəiflik: Maqneziumun kifayət qədər qəbulu əzələ gücü və dözümlülüyün azalması ilə xarakterizə olunan zəifliyin yaranma ehtimalını azaldır. Bu hal yaşlı insanlarda yıxılma, əlillik, xəstəxanaya yerləşdirilmə və hətta ölüm riskini artıra bilər.

Koqnitiv sağlamlıq: Epidemioloji tədqiqatlar maqneziumun yüksək qəbulu ilə koqnitiv pozuntuların riskinin azalması arasında əlaqə olduğunu göstərir.

Yuxunun yaxşılaşması: Maqnezium rahatlaşdırıcı təsirə malikdir və yuxuya getməyə kömək edən melatonin hormonunun ifrazını artıra bilər.

Maqnezium qida rasionunda

50 yaşdan yuxarı böyüklər üçün maqneziumun tövsiyə olunan gündəlik norması qadınlar üçün 320 mq, kişilər üçün isə 420 mq təşkil edir. Yarpaqlı yaşıl tərəvəzlər, qoz-fındıq, toxumlar, tam taxıllı məhsullar, paxlalılar və zənginləşdirilmiş qidalar, o cümlədən səhər yeməyi üçün nəzərdə tutulan quru taxıl məhsulları maqneziumun yaxşı mənbələri sayılır.

Qeyd edək ki, daha əvvəl diyetoloqlar 50 yaşdan yuxarı insanlar üçün ən faydalı yeməklərdən biri barədə də tövsiyə vermişdilər. Onların sözlərinə görə, insan 50 yaşına çatdıqda qidalanma tələbatı dəyişir, orqanizm daha çox zülala ehtiyac duyur və bəzi mikroelementlər ümumi sağlamlığın qorunması üçün daha vacib hala gəlir.

Samir