Əksəriyyətimiz yaşlandıqca enerjimizi, zehni çevikliyimizi və fiziki gücümüzü qorumaq istəyirik.
Hit.az-ın məlumatına görə, diyetoloqlar “EatingWell” portalına bildiriblər ki, sağlam qocalma üçün ideal nahar faydalı yağlar, yağsız zülallar və lifin balanslı birləşməsindən ibarət olmalı, eyni zamanda hazırlanması asan olmalıdır. Onların fikrincə, bu meyarlara ən uyğun seçim qızılbalıqla doldurulmuş avokadodur.
İltihabla mübarizəyə kömək edə bilər
Sağlam qocalmanın qarşısında duran ən ciddi maneələrdən biri xroniki iltihabdır. Zamanla bu proses sağlam hüceyrələrə, toxumalara və orqanlara zərər verir. Tədqiqatlarda bu hal tez-tez “iltihabi qocalma” adlandırılır və ürək xəstəliklərindən tutmuş artritə qədər bir çox yaşa bağlı xəstəliklərlə əlaqələndirilir.
Bu naharın əsas tərkib hissələrindən biri olan qızılbalıq xroniki iltihabla mübarizədə ən güclü vasitələrdən sayılır. Bunun əsas səbəblərindən biri onun tərkibində yüksək miqdarda omeqa-3 yağ turşularının olmasıdır. Araşdırmalara görə, bu maddələr iltihaba səbəb olan birləşmələrin yaranmasını zəiflədir.
Beyin üçün qoruyucu rol oynayır
Alimlər qeyd edirlər ki, beyin əsasən yağlardan ibarətdir və neyronlar arasında əlaqəni təmin edən hüceyrə membranlarının qurulması və bərpası üçün daim müəyyən yağlara, xüsusilə omeqa-3 yağ turşularına ehtiyac duyur.
“Qızılbalıq omeqa-3 yağ turşuları, xüsusilə DHA ilə zəngindir. Bu maddələr beyin hüceyrələrini qorumağa, yaş artdıqca yaddaşı və idrak funksiyalarını dəstəkləməyə kömək edir”, deyə diyetoloq Culiana Krimi bildirib.
Avokado kimi digər inqrediyentlərin, xüsusən də tərkibindəki E vitamini sayəsində malik olduğu antioksidant xüsusiyyətlərlə birlikdə bu yemək zehni sağlamlığın uzun müddət qorunmasına töhfə verir.
Sağlam yağlar qida maddələrinin mənimsənilməsini yaxşılaşdırır
Bir çox əsas vitaminlər, o cümlədən A, D, E və K vitaminləri yağda həll olan vitaminlərdir. Bu isə o deməkdir ki, orqanizmin onları parçalayaraq mənimsəməsi üçün qida rasionunda yağlar olmalıdır. “Avokado faydalı yağlar əlavə edərək bu qida maddələrinin orqanizm tərəfindən daha səmərəli mənimsənilməsinə kömək edir”, – deyə Krimi vurğulayıb.
Əzələ kütləsinin qorunması
30 yaşdan sonra, əgər xüsusi tədbirlər görülməzsə, əzələ kütləsi hər onillikdə təxminən 3–8 faiz azalır. Əzələlərin qorunması təkcə xarici görünüş üçün deyil, həm də sümük sağlamlığının saxlanılması daxil olmaqla bir çox vacib amillər üçün əhəmiyyətlidir.
Bu itkinin qarşısını almaq üçün rasionda yüksək keyfiyyətli, yəni tam zülallara ehtiyac var. Qızılbalıqla doldurulmuş avokado isə orqanizmin özü sintez edə bilmədiyi, lakin ehtiyac duyduğu doqquz əsas amin turşusunun hamısını təmin edir.
Bundan əlavə, zülalla zəngin nahar qanda şəkərin səviyyəsini sabitləşdirir, axşam yeməyinə qədər toxluq hissini qoruyur və orqanizmi güclü qalmaq, yıxılma və ya xəsarətlərə qarşı daha dayanıqlı olmaq üçün lazım olan “tikinti materialları” ilə təmin edir.
Samir
