Daimi soyuq ayaqlar yalnız xarici amillərin nəticəsi olmaya bilər, eyni zamanda orqanizmdə gizli pozğunluqların - qalxanvari vəzin problemləri və narahatlıq pozuntuları kimi - göstəricisi ola bilər. 

HİT.az xəbər verir ki, bu barədə podoloq Manu Vidal “El Economista” nəşrinə verdiyi açıqlamada bildirib.

Mütəxəssisin sözlərinə görə, ayaqların soyuq olmasının ən yayılmış səbəblərindən biri həyat tərzidir – siqaret çəkmək, alkoqol istehlakı, dar ayaqqabı və corab geymək, həmçinin fiziki aktivliyin az olması. Bu amillər qan dövranını zəiflədir və ayaqlara normal qan axınını əngəlləyir.

Lakin Vidal qeyd edir ki, bu simptom daha ciddi problemlərə də işarə edə bilər. Xüsusilə, xroniki soyuq ayaqlar tez-tez qalxanvari vəzin funksiyasının pozulması ilə əlaqələndirilir. Vəzinin fəaliyyəti zəiflədikdə maddələr mübadiləsi yavaşlayır və termorequlyasiya pisləşir, bu da ətrafların daim soyumasına səbəb olur.

Başqa mühüm amil psixoemosional vəziyyətdir. Narahatlıq və xroniki stress damar spazmına gətirib çıxara bilər ki, bu da ayaqlara qan dövranının zəifləməsinə və hətta isti şəraitdə belə soyuqluq hissinə səbəb olur.

Həkim həmçinin bildirir ki, soyuq ayaqlar ürək-damar xəstəliklərinin nəticəsi ola bilər, o cümlədən hipertoniya, yüksək xolesterin səviyyəsi və ateroskleroz. Bu hallarda simptom qan dövranının pozulması ilə bağlıdır.

Ekspert davamlı ayaq soyuqluğunu nəzərə almamağı tövsiyə etmir: əgər bu hiss uzun müddət davam edir və hava şəraiti və ya ayaqqabı ilə əlaqəli deyilsə, mütləq həkimə müraciət etmək lazımdır.

Samir