Yüksək dozalarda vitamin C əlavələri yanğı, ürəkbulanma və narahatlıq yarada bilər. Ən çox rast gəlinən yan təsir osmotik ishaldır — artıq vitamin bağırsaqda su çəkərək ishala səbəb olur.

HİT.az xəbər verir ki, bunu gazeta.ru-ya qastroenteroloq Anna Menseçikova deyib.

“Həddindən artıq konsentrə edilmiş əlavələr, xüsusilə təmiz askorbin turşusu formasında, risk yaradır. Adətən gündə 1000 mq-dan başlayan yüksək dozalar acqarına qəbul edildikdə yanğı, ürəkbulanma və narahatlıq yarada bilər. Ən yayılmış yan təsir — osmotik ishaldır. Artıq vitamin bağırsaqda su çəkir. Mədə-bağırsaq problemləri (məsələn, GERB və ya yüksək turşuluqlu qastrit) olan insanlar belə əlavələrlə diqqətli olmalı, yumşaq, tamponlu formaları (məsələn, kalsium askorbat) seçməli və mütləq həkimlə məsləhətləşməlidirlər”, deyə həkim bildirib.

Menseçikova əlavə edib ki, vitamin C-nin əsas və ən təhlükəsiz mənbəyi qida olmalıdır: balanslı, “rəngli tərəvəz və meyvələrdən” ibarət pəhriz yetkin insanın gündəlik 75–90 mq ehtiyacını tam ödəyir və mədə selikli qişasına zərər vermir.

“Aptek əlavələrinə daha ehtiyatlı yanaşmaq lazımdır — onları dərman kimi qəbul etmək vacibdir. Yüksək dozalar (gündə 500–1000 mq və daha çox) yalnız konkret göstəricilər üçün — məsələn, sübut olunmuş defisit zamanı — qəbul edilməlidir və yemək zamanı içmək tövsiyə olunur. Orqanizmin siqnallarına diqqət yetirmək çox önəmlidir: qəfil yanğı və ya bağırsaq pozğunluğu dozanın azaldılması və ya preparat formasının dəyişdirilməsini tələb edir. Uzunmüddətli yüksək doza (1000 mq-dan çox) zamanı əsas zərər mədədə deyil, böyrəklərdə olur və həssas insanlarda oksalat daşlarının əmələ gəlməsinə səbəb ola bilər. Beləliklə, xroniki mədə-bağırsaq və ya böyrək problemləri olan insanlar əlavələrlə hər hansı eksperiment etməzdən əvvəl mütləq mütəxəssis məsləhəti almalıdırlar”, deyə doktor nəticəni yekunlaşdırıb.

Samir