Yaş artdıqca gecə yuxusu daha səthi olur: insanlar daha tez-tez oyanır və dərin yuxu mərhələsi azalır. Buna görə bir çoxu gecə yuxusunun çatışmazlığını gündüz yatmaqla kompensasiya etməyə çalışır.

HİT.az xəbər verir ki, bu barədə “Meglepetes” yazır.

Bununla belə, beynəlxalq səhiyyə təşkilatları və yuxu üzrə tədqiqatçılar bildirirlər ki, qısa – 15–20 dəqiqəlik gündüz yuxusu faydalıdır, lakin uzun və ya gec saatlarda yatmaq axşam yuxuya getməyi çətinləşdirə və gecə yuxusunun keyfiyyətini pisləşdirə bilər.

Yuxu pozuntuları mərkəzinin tibbi direktoru Şarlin Qamaldo qeyd edir: “Uzun gündüz yuxusu gecə istirahətini poza bilər və hətta gecə yuxusunun keyfiyyətsiz olduğunun əlaməti ola bilər”.

Onun sözlərinə görə, gündüz yuxusu faydalı olsa da, hər bir insanın fərdi xüsusiyyətləri və yuxu rejimi nəzərə alınmalıdır. Xüsusilə yaşlı insanlarda uzun gündüz yuxusu koqnitiv funksiyalara mənfi təsir göstərə bilər.

Həkim vurğulayır ki, problem gündüz yatmaqda deyil, onun həddindən artıq uzun çəkməsindədir.

Gündüz nə qədər yatmaq olar?

Mütəxəssislərin tövsiyəsinə görə, yaşlı insanlar üçün 20–30 dəqiqəlik gündüz yuxusu kifayətdir. Ən uyğun vaxt isə günorta sonrası – təxminən saat 13:00-dan 16:00-dək olan dövrdür.

Əgər gündüz yuxusu 60–90 dəqiqədən çox davam edərsə, axşam yuxuya getmək çətinləşə bilər.

Nə vaxt narahat olmaq lazımdır?

Əgər gündüz yuxusu müntəzəm olaraq bir neçə saat çəkirsə və ya onsuz gün keçirmək çətinləşirsə, bu, diqqət tələb edən haldır.

Həkimlərin fikrincə, belə vəziyyətdə gecə yuxusunun keyfiyyətini yoxlamaq lazımdır, çünki daimi gündüz yuxululuğu çox vaxt səbəb deyil, başqa problemin əlamətidir.

Samir