Yaşıl çay sağlamlıq üçün ən faydalı içkilərdən biri hesab olunur. Diyetoloqların sözlərinə görə, onun müntəzəm qəbulu orqanizmdə xroniki iltihabın azalmasına kömək edə bilər. Xroniki iltihab ürək-damar xəstəlikləri, 2-ci tip diabet və bəzi neyrodegenerativ xəstəliklərin inkişafı ilə əlaqələndirilir.

HİT.az xəbər verir ki, "EatingWell" nəşrinin yazdığına görə, yaşıl çayın faydası əsasən tərkibindəki güclü antioksidantlar – katexinlərlə bağlıdır. Bu maddələr sərbəst radikalları zərərsizləşdirərək hüceyrələrin zədələnməsinin və iltihab proseslərinin azalmasına kömək edir. Eyni zamanda orqanizmin öz antioksidant müdafiə sistemini də gücləndirir.

Mütəxəssislər bildirirlər ki, katexinlər insulinə qarşı həssaslığın yaxşılaşmasına, xolesterin səviyyəsinin tənzimlənməsinə və yaşla əlaqəli bəzi beyin xəstəliklərinin riskinin azalmasına da müsbət təsir göstərə bilər.

38 randomizə olunmuş klinik tədqiqatın nəticələrini əhatə edən icmal göstərib ki, yaşıl çayın müntəzəm qəbulu antioksidant fermentlərin səviyyəsini artırır və oksidləşdirici stressi azaltmağa kömək edir. Bu amil xroniki iltihabın əsas səbəblərindən biri hesab olunur. Bəzi araşdırmalarda isə yaşıl çayın iltihab göstəricilərinin azalmasına töhfə verdiyi müəyyən edilib.

Diyetoloqlar qeyd edirlər ki, iltihabla mübarizə yalnız bir içkidən asılı deyil. Bunun üçün balanslı qidalanmaq, bol tərəvəz, meyvə, giləmeyvə və yarpaqlı göyərti istehlak etmək, omeqa-3 yağ turşuları ilə zəngin qidaları – yağlı balıq, qoz və kətan toxumunu rasiona daxil etmək tövsiyə olunur.

Bundan əlavə, əlavə şəkər, şəkərli içkilər, şirniyyatlar və alkoqolun qəbulunu məhdudlaşdırmaq, gecə 7–9 saat keyfiyyətli yuxu yatmaq və müntəzəm fiziki aktivliklə məşğul olmaq da orqanizmdə iltihabın azalmasına kömək edən əsas amillər sırasında göstərilir.

Mütəxəssislər vurğulayırlar ki, yaşıl çay sağlam həyat tərzinin bir hissəsi kimi faydalı ola bilər, lakin hər hansı xəstəliyin müalicəsini əvəz etmir.

Samir