ABŞ-ın "George Mason" Universitetinin alimləri müəyyən ediblər ki, hər gün ucadan oxumaq, əl ilə yazmaq və sadə riyazi məsələləri həll etmək yaşlı insanlarda yaddaşın və idrak funksiyalarının qorunmasına kömək edə bilər. 

HİT.az xəbər verir ki, araşdırmanın nəticələri "Educational Gerontology" jurnalında dərc olunub.

Tədqiqatda yaşı 59-dan yuxarı olan 102 nəfər iştirak edib. Onlar hər gün təxminən 10 dəqiqə ərzində üç sadə fəaliyyətlə məşğul olublar: ucadan oxuyub, əl ilə yazı yazıb və sadə riyazi nümunələr həll ediblər. Bundan əlavə, iştirakçılar motivasiyanı qorumaq və məşqləri müntəzəm yerinə yetirmək üçün həftədə bir dəfə qrup şəklində görüşüblər.

Proqram başa çatdıqdan sonra iştirakçıların qısa koqnitiv test üzrə orta nəticəsi 15 mümkün baldan 12,73-dən 13,26-ya yüksəlib. Ən nəzərəçarpan irəliləyiş sözlərin yadda saxlanılması və xatırlanması ilə bağlı tapşırıqlarda qeydə alınıb. İştirakçılar həmçinin əvvəlki illə müqayisədə öz yaddaşlarının vəziyyətini daha yüksək qiymətləndiriblər.

Ən güclü müsbət nəticələr müstəqil yaşayan yaşlı şəxslərdə müşahidə olunub. Qocalar evində yaşayan iştirakçılarda da müəyyən yaxşılaşma qeydə alınsa da, bu dəyişikliklər daha zəif olub.

Tədqiqat müəllifləri vurğulayırlar ki, nəticələr ehtiyatla qiymətləndirilməlidir. Araşdırmada nəzarət qrupu olmadığı üçün koqnitiv göstəricilərdəki yaxşılaşmanın müntəzəm ünsiyyət, iştirakçıların gözləntiləri və ya eyni testlərin təkrar keçirilməsi ilə əlaqədar olması istisna edilmir.

Bununla belə, tədqiqat göstərir ki, gündəlik sadə zehni məşqlər yaşlı insanlarda yaddaşı və koqnitiv funksiyaları dəstəkləmək üçün əlçatan üsullardan biri ola bilər.

Samir