Kalsium orqanizmin sağlam fəaliyyəti üçün vacib minerallardan biridir. O, təkcə sümüklərin və dişlərin möhkəmliyini təmin etmir, həm də sinir sistemi, əzələlərin fəaliyyəti və qan təzyiqinin normal saxlanılmasında mühüm rol oynayır.

HİT.az xəbər verir ki, "Martha Stewart" portalının yazdığına görə, diyetoloqlar kalsiumun ən yaxşı mənbəyi kimi südü göstərirlər.

Mütəxəssis Lusiana Soareş bildirir ki, bir stəkan (240 ml) inək südündə təxminən 306 milliqram kalsium var. Südün üstünlüyü ondadır ki, tərkibindəki kalsium orqanizm tərəfindən asan mənimsənilir. Bundan əlavə, satışda olan süd məhsullarının əksəriyyəti D vitamini ilə zənginləşdirilir ki, bu da kalsiumun sorulmasını yaxşılaşdırır.

Diyetoloq Roksana Ehsani qeyd edir ki, süd yalnız kalsium və D vitamini ilə deyil, həm də sümük sağlamlığı üçün vacib olan fosfor, zülal, sink, kalium və maqnezium kimi maddələrlə zəngindir.

Bundan əlavə, südün tərkibindəki zülal, B12 vitamini, riboflavin və digər qida maddələri toxumaların bərpasına, sinir sisteminin normal fəaliyyətinə, qırmızı qan hüceyrələrinin yaranmasına və enerji mübadiləsinə dəstək verir. Südün zülalı həmçinin əzələ kütləsinin qorunmasına və uzun müddət toxluq hissinin yaranmasına kömək edə bilər.

Mütəxəssislər sağlam insanlar üçün gündə üç stəkana qədər inək südü qəbul etməyi tövsiyə edirlər.

İdmanla məşğul olanlar üçün isə məşqdən sonra şokoladlı süd faydalı hesab edilir. Dietoloqlar bildirirlər ki, onun tərkibindəki karbohidrat və zülalın təxminən 3:1 nisbəti maye və enerji ehtiyatlarının bərpasına, həmçinin əzələlərin bərpasına kömək edir.

Mütəxəssislərin sözlərinə görə, yağsız, 1 faizli, 2 faizli və ya tam yağlı süd arasında kalsiumun miqdarı baxımından ciddi fərq yoxdur. Laktozasız süd də adi süd kimi oxşar qida dəyərinə malikdir.

Qeyd edək ki, kalsiuma gündəlik tələbat yaş və cinsdən asılı olaraq dəyişir. Ümumilikdə böyüklər üçün gündə 1000–1200 milliqram kalsium qəbul edilməsi tövsiyə olunur.

Bununla yanaşı, qidalanma ilə bağlı tövsiyələr fərdi sağlamlıq vəziyyətinə görə dəyişə bilər. Xüsusilə süd allergiyası, laktoza dözümsüzlüyü və ya digər xəstəlikləri olan şəxslər pəhrizlərini həkim və ya dietoloqla məsləhətləşərək tənzimləməlidirlər.

Samir