Sarımsaq tərkibindəki allisin sayəsində böyrək sağlamlığı üçün ən faydalı ədviyyatlardan biri ola bilər. Bu maddə sarımsağın hüceyrələri mexaniki şəkildə zədələndikdə yaranır və ona xarakterik kəskin qoxu verir. 

HİT.az xəbər verir ki, bu barədə amerikalı diyetoloq Sara Prato “Eating Well” nəşrinə açıqlamasında bildirib.

Allisin antioksidant və iltihabəleyhinə xüsusiyyətlərə malikdir. Mütəxəssisin sözlərinə görə, o, xroniki böyrək xəstəliyi riskinin artması ilə əlaqəli olan iltihab və oksidləşdirici stressi azaltmağa kömək edir.

Nefroloq Raida Givala qeyd edib ki, sarımsağın faydası yalnız böyrəklərə birbaşa təsiri ilə bağlı olmaya bilər. Allisin qan damarlarını genişləndirən və arterial təzyiqi aşağı salmağa kömək edən azot oksidinin istehsalını stimullaşdırır. Bu, böyrək xəstəliklərinin profilaktikası baxımından vacibdir. Çünki yüksək qan təzyiqi böyrəklərin damarlarını zədələyir və zaman keçdikcə orqanın fəaliyyətini poza bilər.

“Bundan əlavə, sarımsağın müntəzəm istifadəsi ürək-damar xəstəlikləri və diabet riskini azalda bilər. Bu xəstəliklər də xroniki böyrək xəstəlikləri üçün risk amilləri hesab olunur”, deyə mütəxəssis vurğulayıb.

Bununla belə, mütəxəssislər sarımsağı dərman hesab etmirlər və təyin olunmuş müalicənin onunla əvəz edilməsini tövsiyə etmirlər. Söhbət sarımsağın sağlam qidalanmanın bir hissəsi kimi gündəlik rasiona daxil edilməsindən gedir.

Samir