İsti dəniz suyunda rotavirusa yoluxmaq və ya bağırsaq çöplərinə məruz qalmaq daha asan ola bilər. Hava ilə su arasındakı temperatur fərqi isə kəskin beyin qan dövranı pozuntusuna səbəb ola bilər. 

HİT.az xəbər verir ki, bu barədə gazeta.ru-ya Rusiya Təhsil Dövlət Universitetinin tibb fakültəsinin terapiya kafedrasının dosenti İrina Volgina danışıb.

"İsti dənizdə çimmək zahirən təhlükəsiz görünsə də, sağlamlıq üçün bir sıra risklərlə əlaqəlidir. Dəniz suyunda rotavirus, enterovirus, hepatit A virusu və ya bağırsaq çöpü kimi patogen mikroorqanizmlər ola bilər. Onlara yalnız təsadüfən suyu udmaqla deyil, dəridəki kiçik zədələr vasitəsilə də yoluxmaq mümkündür. Eyni zamanda isti su insanda saxta rahatlıq hissi yaradır və buna görə insanlar dənizdə daha uzun müddət qalırlar. Bu isə hipotermiyaya və xroniki xəstəliklərin kəskinləşməsinə səbəb ola bilər. Xüsusilə tənəffüs və sidik-ifrazat sistemləri həssasdır", deyə Volgina bildirib.

O, hava ilə su arasında temperaturun kəskin dəyişməsinin ciddi təhlükə yaratdığını xəbərdar edib. Əgər insan bu zaman başını günəşdən qorumursa, mənfi nəticələrin riski daha da artır. Ürək-damar xəstəlikləri olan insanlarda belə temperatur fərqləri hipertoniya tutmasından miokard infarktına və ya kəskin beyin qan dövranı pozuntusuna qədər ağır fəsadlara səbəb ola bilər.

"İnsan suya yorğun və ya spirtli içkinin təsiri altında girirsə, risklər artır. Belə vəziyyətdə bədənə nəzarət zəifləyir, qıcolma, yıxılma, daşlara və ya suya düşmüş budaqlara xəsarət yetirmə ehtimalı yüksəlir. Təbii təhlükələri də unutmaq olmaz – meduzaların yandırması və ya dəniz kirpilərinin sancması mümkündür", deyə Volgina qeyd edib.

Sağlamlıq üçün riskləri azaltmaq məqsədilə ekspert bir neçə sadə təhlükəsizlik qaydasına əməl etməyi tövsiyə edib. Çimmək üçün yalnız xüsusi təchiz edilmiş və yoxlanılmış yerlər seçilməli, çirkli su olan ərazilərdən uzaq durulmalıdır. Dənizdə qalma müddətinə də nəzarət etmək vacibdir.

"Orqanizmi kəskin temperatur dəyişikliklərindən və həddindən artıq isinmədən, dərini isə günəşin aqressiv təsirindən qorumaq üçün mütləq baş örtüyü taxın və suya davamlı günəşdən qoruyucu kremlərdən istifadə edin. Dənizdən çıxdıqdan sonra mütləq duş qəbul edin. Bu, dəridə qalan duzu, qumu və mümkün patogenləri yumağa, bununla da dəri reaksiyaları və infeksiyaların yaranması riskini azaltmağa kömək edəcək", deyə Volgina bildirib.

Samir