Sarımsağın rasionda artırılması ürək-damar sağlamlığına müsbət təsir göstərə bilər. Araşdırmalara görə, xüsusilə çiy sarımsaqda olan allisin maddəsi xolesterin və qan təzyiqinin tənzimlənməsinə kömək edə bilər.
HİT.az xəbər verir ki, mütəxəssislər isə sarımsağı xolesterin dərmanlarının əvəzi hesab etməməyi və xüsusilə qan durulaşdırıcı preparatlar qəbul edən şəxslərin həkimlə məsləhətləşməsini tövsiyə edir.
Sarımsağın orqanizmə 5 mümkün təsiri:
1. “Pis” xolesterin azala bilər
Bəzi araşdırmalar sarımsaq və sarımsaq tərkibli əlavələrin LDL, yəni “pis” xolesterinin səviyyəsini aşağı sala biləcəyini göstərir. Bir araşdırmada sarımsaq tərkibli əlavə qəbul edən iştirakçılarda 8 həftədən sonra LDL səviyyəsi orta hesabla 6 faiz azalıb.
2. Ümumi xolesterin aşağı düşə bilər
19 araşdırmanın nəticələrini birləşdirən meta-analizdə sarımsaq əlavələrinin metabolik sindromu olan insanlarda ümumi xolesterinin azalması ilə əlaqəli olduğu müəyyən edilib. Daha nəzərəçarpan nəticələr çiy və xüsusi şəkildə yetişdirilmiş sarımsaqla bağlı olub.
3. “Yaxşı” xolesterin arta bilər
HDL, yəni “yaxşı” xolesterinin səviyyəsində müəyyən artım müşahidə edilsə də, bu nəticə bütün araşdırmalarda təsdiqlənməyib. Buna görə sarımsağın HDL-yə təsiri barədə elmi məlumatlar hələ də ziddiyyətlidir.
4. Qanda şəkərin səviyyəsi azala bilər
Sarımsağın insulinə həssaslığı artırmağa və insulin müqavimətini azaltmağa kömək edə biləcəyi ehtimal olunur. Bəzi tədqiqatlarda onun diabet dərmanları ilə birlikdə qəbulunun qan şəkərinin azalmasına təsir etdiyi müşahidə edilib.
5. Qan təzyiqi aşağı düşə bilər
Sarımsağın həm çiy, həm qurudulmuş, həm də yetişdirilmiş formalarının qan təzyiqini müəyyən qədər azaltmağa kömək etdiyi araşdırmalarda göstərilib. Xolesterinin və təzyiqin nəzarətdə saxlanması isə ürək-damar xəstəlikləri riskinin azaldılması baxımından əhəmiyyətlidir.
Çiy sarımsaq daha təsirli ola bilər
Sarımsağın əsas aktiv maddələrindən biri olan allisin xüsusilə çiy sarımsaqda daha çox qorunur. İstiliklə emal zamanı bu maddənin bir hissəsi parçalanır. Buna görə sarımsağın sağlamlıq baxımından potensial faydalarından yararlanmaq istəyənlər onu çiy və ya mümkün qədər az bişirilmiş formada istehlak edə bilərlər.
Bununla belə, həddindən artıq sarımsaq qarın ağrısı, qaz, ürəkbulanma və ağız qoxusuna səbəb ola bilər. Qan durulaşdırıcı dərman qəbul edənlərdə qanaxma riski də arta bilər.
Samir
