Monopəhriz – insanın bir neçə gün və ya həftə ərzində əsasən yalnız bir məhsul qəbul etdiyi qidalanma rejimi – immun sisteminin zəifləməsinə səbəb ola bilər. 

HİT.az xəbər verir ki, bu barədə qastroenteroloq Sergey Vyalov “Telegram” kanalında məlumat verib. 

Mütəxəssisin sözlərinə görə, belə qidalanmanın nə arıqlamaq, nə də mədə-bağırsaq traktını “yenidən işə salmaq” üçün sübut edilmiş faydası var.

Vyalov zərurət olmadan monopəhrizlərdən istifadə etməməyə çağırıb. Onun sözlərinə görə, tərəvəz, meyvə, kəsmik və ya dənli bitkilər kimi yalnız bir məhsul üzərində qurulan rasion orqanizmi bütün zəruri qida maddələri ilə təmin edə bilməz. Nəticədə vitaminlər, minerallar və digər vacib birləşmələrin çatışmazlığı yarana bilər.

Mütəxəssis digər problem kimi bağırsaq mikroflorasında mümkün dəyişiklikləri göstərib. Rasionun ciddi şəkildə məhdudlaşdırılması bağırsaqlara daxil olan qida maddələrinin müxtəlifliyini azaldır və bu, mikroorqanizmlərin tərkibinə təsir göstərə bilər. Öz növbəsində, mikrobiotadakı pozuntular həzm və immun sistemlərinin fəaliyyətinə mənfi təsir göstərə bilər.

Vyalovun sözlərinə görə, monopəhrizin mədə-bağırsaq traktını “təmizləməyə” və ya “yenidən işə salmağa” kömək etdiyi barədə fikir kifayət qədər elmi əsaslara malik deyil. Əksinə, uzun müddət yalnız bir məhsulla qidalanmaq orqanizm üçün əlavə yük yarada bilər.

Samir