Kalsium deyəndə ilk ağla gələn məhsul süd olur. Lakin dietoloqların fikrincə, kalsiumla zəngin başqa qidalar da var və onların bəzilərində bu mineralın miqdarı süddəkindən daha yüksəkdir.

HİT.az xəbər verir ki, bu barədə "Marthastewart" yazıb.

Bir stəkan inək südündə təxminən 300 mq kalsium olur. Yetkin insan üçün gündəlik tövsiyə olunan miqdar isə təxminən 1000 mq-dır.

1. Tofu

Kalsium sulfatla hazırlanmış təxminən 240 ml tofu porsiyasında 410 mq-a qədər kalsium ola bilər. Tofu həmçinin bitki mənşəli zülalla zəngindir.

2. Yarpaqlı kələm

İki stəkan çiy yarpaqlı kələmdə təxminən 358 mq kalsium var. Tərəvəz həm də sümük sağlamlığı üçün vacib olan K vitamini ilə zəngindir.

3. Küncüt

Cəmi dörd xörək qaşığı küncüt təxminən 351 mq kalsium ehtiva edir. Küncütdən hazırlanan tahin də bu mineralın yaxşı mənbəyidir.

4. Badam südü

Kalsiumla zənginləşdirilmiş bir stəkan şəkərsiz badam südündə təxminən 346 mq kalsium ola bilər. Bitki mənşəli süd məhsullarının tərkibindəki kalsium miqdarı istehsalçıdan asılı olaraq dəyişir.

5. Yoğurt

Təxminən 1,5 stəkan adi yağsız yoğurtda 334 mq kalsium var. Yoğurt həmçinin zülal və probiotiklərlə zəngindir. Adi yoğurtda kalsium miqdarı, adətən, yunan yoğurtundan daha çox olur.

6. Konservləşdirilmiş sardina

Sümükləri ilə birlikdə 85 qram konserv sardina təxminən 325 mq kalsium verir. Balıq həmçinin zülal və D vitamini mənbəyidir. Konservləşdirmə zamanı yumşalan sümükləri yemək mümkündür.

7. Konservləşdirilmiş qızılbalıq

Sümükləri ilə birlikdə təxminən 140 qram konserv qızılbalıqda 306 mq kalsium ola bilər. Burada da mineralın əhəmiyyətli hissəsi yeyilə bilən sümüklərdən gəlir.

8. Kalsiumla zənginləşdirilmiş portağal şirəsi

Bir stəkan zənginləşdirilmiş portağal şirəsində təxminən 300 mq kalsium olur. Bu, bir stəkan inək südündəki miqdara demək olar ki, bərabərdir. Mütəxəssislər əlavə şəkərsiz variantlara üstünlük verməyi məsləhət görürlər.

Samir