Pəhriz saxlamanıza baxmayaraq arıqlaya bilmir, özünüzü daim yorğun hiss edir, üşüyür və ya saç tökülməsi yaşayırsınızsa, bunun səbəbi yalnız qidalanma olmaya bilər. Mütəxəssislər qalxanabənzər vəzə təsir edən Haşimoto tireoiditinin orqanizmdə bir çox sistemin fəaliyyətini yavaşlada biləcəyinə diqqət çəkirlər.

HİT.az xəbər verir ki, bədən çəkisinə nəzarətdən enerji səviyyəsinə, dəri və saç sağlamlığından zehni fəaliyyətə qədər bir çox prosesə təsir edən qalxanabənzər vəz orqanizmin maddələr mübadiləsinin sürətində mühüm rol oynayır. İmmunitet sisteminin qalxanabənzər vəzə hücum etməsi nəticəsində yaranan Haşimoto tireoiditi zamanla hormon istehsalının azalmasına səbəb ola bilər.

Daxili xəstəliklər üzrə mütəxəssis doktor Cemilə Feyza Elbistan Haşimoto xəstəliyinin yalnız qalxanabənzər vəzlə bağlı problem olmadığını, bütün orqanizmə təsir göstərə bilən bir proses olduğunu bildirib. Mütəxəssislərin sözlərinə görə, Haşimoto xəstəliyinin inkişafında genetik meyillilik mühüm rol oynayır. Bununla yanaşı, bəzi ətraf mühit amilləri də xəstəliyi tətikləyə bilər.

Haşimoto zamanı hansı əlamətlər müşahidə olunur?

Haşimoto tireoiditi qalxanabənzər vəzin fəaliyyətinin zəifləməsinə səbəb olduqda maddələr mübadiləsi yavaşlaya bilər. Bu isə çəki artımı və ya pəhrizə baxmayaraq arıqlamaqda çətinlik, davamlı yorğunluq, soyuğa həssaslıq və saç tökülməsi kimi əlamətlərlə özünü göstərə bilər.

Tiroidin qiymətləndirilməsində TSH göstəricisinin mühüm meyar olduğunu bildirən doktor Elbistan bununla belə, yalnız bu göstəricinin kifayət etmədiyini vurğulayıb.

Mütəxəssislərin fikrincə, Haşimoto ilə mübarizədə yalnız dərman müalicəsi kifayət etməyə bilər. Müntəzəm həkim nəzarəti, balanslaşdırılmış qidalanma, vitamin və mineral çatışmazlıqlarının aradan qaldırılması, eləcə də sağlam həyat tərzi vərdişləri müalicənin mühüm hissələrindəndir.

Bir neçə simptomun eyni vaxtda müşahidə edilməsi halında problemin əsas səbəbinin araşdırılması və mütəxəssisə müraciət edilməsi tövsiyə olunur.

Samir