Yunan yoqurtu uzun müddət kifayət qədər zülal əldə etməyin ən sadə üsullarından biri hesab olunub – 100 qramlıq porsiyada təxminən 10 qram zülal var. Lakin zülal tərkibi bundan xeyli yüksək olan qəlyanaltılar da mövcuddur. 

HİT.az xəbər verir ki, bu barədə “Verywell Health” yazır.

Zülal qidalanmanın əsas elementlərindən biridir. O, əzələlərin böyüməsi və bərpasında mühüm rol oynayır.

Soyuducumuzda tez-tez olan bəzi məhsullar zülal tərkibinə görə bir qab yunan yoqurtunu iki, hətta üç dəfə üstələyir.

Nəşr belə 6 məhsulu təqdim edib.

Qurudulmuş mal əti (cərki)

Zülal konsentrasiyasına görə əsl liderdir: 100 qram məhsulun tərkibində 33,2 qram zülal var. Bundan əlavə, dəmir, kalsium, maqnezium, sink və fol turşusu ilə zəngindir. Bununla belə, materialda qeyd olunur ki, bu qəlyanaltı gündəlik qidalanma üçün uyğun deyil. Tərkibində duz və yağların çox olması səbəbindən dietoloqlar onu ölçülü şəkildə istehlak etməyi məsləhət görürlər.

Kəsmik

Adi kəsmik 100 qramlıq porsiyada 11,6 qram zülal, həmçinin kalsium, yod, biotin və B12 vitamini təmin edir. “USDA FoodData Central” məlumat bazasına əsasən, bu məhsul tam yağlı kəsmik kimi təsnif edilir. Universal xüsusiyyətinə görə həm şirin, həm də duzlu yeməklərlə yaxşı uyğunlaşır.

Tuna

Konservləşdirilmiş tuna qidalılığı və rahat istifadəsi ilə seçilir: 100 qramında 19 qram zülal və cəmi 90 kilokalori var. Balıq həmçinin dəmir, niasin, B12 və D vitaminləri ilə zəngindir. Bununla belə, “Hartford Healthcare”in Sent-Vinsent Tibb Mərkəzinin mütəxəssisləri tərkibində civə izlərinin olması səbəbindən həftəlik istehlakı 250 qramla məhdudlaşdırmağı tövsiyə edirlər.

Edamame

Gənc soya paxlaları 100 qram məhsulda 11,9 qram zülal, həmçinin lif, kalium və folatlar təmin edir. “Nutrients” jurnalında dərc olunan araşdırmaya görə, bu paxlaların müntəzəm olaraq qida rasionuna daxil edilməsi ürək-damar xəstəlikləri, osteoporoz və bəzi onkoloji xəstəliklərin riskini azaltmağa kömək edir.

Skir

Yağsız süddən xüsusi süzmə üsulu ilə hazırlanan ənənəvi islandiya süd məhsuludur. 100 qram skirin tərkibində 11,3 qram zülal və cəmi 80 kilokalori var. Materialın müəlliflərinin sözlərinə görə, skir adi yunan yoqurtundan bir qədər üstündür: onun zülal tərkibi bir qədər yüksək, kaloriliyi isə nəzərəçarpacaq dərəcədə aşağıdır.

Qarpız tumları

Bitki mənşəli zülal mənbələri arasında gözlənilməz liderdir. 100 qram qurudulmuş tumda 28,3 qram zülal var. Lakin materialda mühüm bir məqama diqqət çəkilir: eyni miqdarda tum 557 kilokalori və 47 qram yağ əlavə edir. Buna görə bu qəlyanaltını dolu kasa ilə deyil, kiçik ovuclarda yemək daha məqsədəuyğundur.

Samir