Oreqon Dövlət Universitetinin psixoloqları müəyyən ediblər ki, stressi azaltmaq və ümumi rifahı yaxşılaşdırmaq üçün təmiz havada gəzintinin müddətindən çox ətraf aləmə diqqətin keyfiyyəti əhəmiyyətlidir.
HİT.az xəbər verir ki, “Frontiers in Psychology” jurnalında dərc olunan pilot tədqiqatın nəticələri göstərib ki, şüurlu diqqət praktikası parkda heç bir xüsusi məqsəd və ya düşüncə olmadan sadəcə gəzməkdən daha effektivdir.
Genişmiqyaslı təcrübədə 18-72 yaş arasında 35 yetkin könüllü iştirak edib. Tədqiqatçılar onları təsadüfi qaydada iki qrupa bölüblər. Birinci qrup iki həftə ərzində hər gün təbiətdə 15 dəqiqəlik xüsusi şüurlu diqqət məşqləri edib, ikinci qrup isə heç bir göstəriş olmadan sadəcə açıq havada gəzib. Məlum olub ki, ətraf mühitə şüurlu şəkildə diqqət yetirən iştirakçıların psixoloji sağlamlığında və narahatlıq səviyyəsində daha böyük yaxşılaşma müşahidə olunub.
Maraqlıdır ki, şüurlu diqqət qrupundakı iştirakçılar bu nəticələrə nəzarət qrupundan xeyli az müddət açıq havada olmalarına baxmayaraq nail olublar. Alimlər həmçinin müəyyən ediblər ki, strukturlaşdırılmış proqramdan ən çox başlanğıcda psixoloji rahatlıq səviyyəsi daha aşağı olan könüllülər faydalanıblar. İlkin rifah səviyyəsi yüksək olan insanlarda isə bu təsir daha zəif olub.
“Araşdırmamızın nəticələri göstərir ki, təbiətlə qarşılıqlı əlaqənin keyfiyyəti açıq havada keçirilən vaxtın sadəcə müddətindən daha böyük əhəmiyyət daşıyır”, – tədqiqatın aparıcı müəllifi, doktor Sabina Hyumer vurğulayıb. O əlavə edib ki, hətta qısa, lakin müntəzəm şüurlu diqqət praktikaları insanlara gündəlik həyatın yaratdığı stressin nəticələrinin öhdəsindən gəlməyə kömək edə bilər.
Təbiətlə təmas psixoloji sağlamlığı dəstəkləyir və depressiyanın inkişaf riskini azaldır. Lakin əvvəlki tədqiqatların əksəriyyəti yalnız açıq havada keçirilən vaxtın müddətinə diqqət yetirib. Yeni araşdırma göstərir ki, insan ətraf aləmlə həqiqi emosional əlaqəni məhz məqsədyönlü və şüurlu diqqət vasitəsilə qurur.
Əldə olunan məlumatlar uzun müddət meşədə və ya parkda gəzməyə vaxt ayırmaqda xüsusilə çətinlik çəkən meqapolislərin sakinləri üçün əlçatan terapiya üsullarının hazırlanmasına kömək edə bilər.
Samir
