Maqnezium və kalium ürəyin, əzələlərin və sinir sisteminin normal fəaliyyətində mühüm rol oynayır. Bu mineralları isə yalnız qida əlavələrindən deyil, gündəlik istifadə etdiyimiz bir sıra məhsullardan da almaq mümkündür.

HİT.az xəbər verir ki, bəzi qidalar həm maqnezium, həm də kalium baxımından zəngindir.

Maqnezium enerji istehsalı, zülal sintezi və fermentlərin fəaliyyəti ilə yanaşı, qanda şəkərin və arterial təzyiqin normal səviyyədə saxlanmasına kömək edir. Mütəxəssislərə görə, qadınların gündəlik maqnezium ehtiyacı 310-320, kişilərin isə 400-420 milliqram təşkil edir. Hamiləlik dövründə bu göstərici təxminən 350 milliqrama yüksəlir.

Maqneziumla zəngin qidalar:

* manqold – bir stəkan bişmiş məhsulda 961 mq;
* ispanaq – 839 mq;
* edamame – 675 mq;
* qara lobya – 611 mq;
* balqabaq tumu – 28 qramda 229 mq;
* Braziliya qozu və keşyu – 28 qramda 187 mq;
* çia toxumu – 28 qramda təxminən 115 mq.

Maqneziumun orqanizm tərəfindən mənimsənilməsinə ümumi qidalanma da təsir göstərə bilər. Zülal və D vitamini ilə zəngin rasion onun mənimsənilməsini dəstəkləyə, bəzi içkilər və spirt isə bu prosesə mane ola bilər.

Kalium hansı məhsullarda çoxdur?

Kalium orqanizmdə maye balansının qorunmasına, əzələ və sinir sisteminin fəaliyyətinə, eləcə də ürəyin normal işləməsinə kömək edən mühüm elektrolitdir.

Kaliumun əsas qida mənbələri arasında kartof, soya, banan, quru ərik, mərcimək, kişmiş və treska balığı göstərilir. Bir orta ölçülü kartofda təxminən 941 mq, bananda 422 mq, beş ədəd quru ərikdə isə 465 mq kalium ola bilər.

Maraqlıdır ki, banan kalium mənbəyi kimi məşhur olsa da, bu mineralı daha yüksək miqdarda ehtiva edən məhsullar da var.

Hər iki mineralı verən qidalar

Bəzi məhsullar həm maqnezium, həm də kaliumla zəngindir. Məsələn, bir stəkan bişmiş ispanaqda təxminən 157 mq maqnezium və 839 mq kalium olur. Böyük avokadoda isə bu göstəricilər müvafiq olaraq 73 və 1070 mq təşkil edir.

Lima lobyası, qəhvəyi düyü və çia toxumu da hər iki mineralın mənbələri sırasında yer alır.

Mütəxəssislər qeyd edirlər ki, maqnezium və kalium ürək-damar sistemi, əzələlər və sinir sistemi üçün vacibdir. Bu mineralların yuxu ilə əlaqəsi də bəzi araşdırmalarda öyrənilib. Xüsusilə 2-ci tip diabet və yuxusuzluğu olan insanlarla aparılan bir araşdırmada maqnezium və kalium qəbulunun yuxu müddətində və yuxusuzluq əlamətlərində dəyişikliklərlə əlaqəli olduğu bildirilib.

Samir