Bananın tez qaralmasının qarşısını almaq üçün onu düzgün temperaturda və uyğun şəraitdə saxlamaq vacibdir. Mütəxəssislər bu meyvəni həm soyuducuda, həm də digər meyvələrin yanında saxlamağın onun yetişmə prosesinə təsir göstərə biləcəyini bildirirlər.

HİT.az xəbər verir ki, bananın saxlanması ilə bağlı tövsiyələrə görə, onun üçün ən uyğun temperatur 13-14 dərəcə Selsidir. 15-20 dərəcə arasında temperatur isə yetişmə prosesini sürətləndirir.

Banan tropik meyvə olduğundan soyuğa həssasdır. 13 dərəcədən aşağı temperatur qabığın qaralmasına və “soyuq zədələnməsi” adlanan prosesə səbəb ola bilər. Buna görə bananı soyuducuda saxlamaq məsləhət görülmür. Lakin meyvə artıq istənilən yetişmə səviyyəsinə çatıbsa, soyuducu onun iç hissəsinin keyfiyyətini bir neçə gün qorumağa kömək edə bilər. Bu halda qabıq daha tez qarala bilər.

Bananı digər meyvələrin, xüsusilə alma və armudun yanında saxlamaq da düzgün deyil. Bu meyvələr etilen adlı təbii bitki hormonunu ifraz edir. Banan da etilenə həssas olduğundan belə qonşuluq onun daha sürətli yetişməsinə və qaralmasına səbəb ola bilər.

Mütəxəssislər banan dəstəsini asaraq saxlamağı da tövsiyə edirlər. Bu üsul meyvələrin daha bərabər yetişməsinə və əzilmə nəticəsində yaranan ləkələrin azalmasına kömək edə bilər.

Banan üçün ən münasib yer sərin, qaranlıq və yaxşı havalandırılan məkan hesab olunur. Temperaturun təxminən 13-14 dərəcə olduğu anbar və ya sərin künc ideal seçimdir. Belə yer yoxdursa, bananı evin ən sərin hissəsində, günəş şüalarından və soba kimi istilik mənbələrindən uzaqda saxlamaq məsləhətdir.

Samir