Səhər ilk içilən içki qan şəkərinin səviyyəsinə təsir göstərə bilər. Dietoloqlar bəzi içkilərin şəkərin sürətli yüksəlməsinin qarşısını almağa və gün ərzində qlükoza səviyyəsinə nəzarəti dəstəkləməyə kömək edə biləcəyini bildirirlər.

HİY.az xəbər verir ki, “EatingWell” nəşri dietoloqların tövsiyələrinə əsasən qan şəkərinə nəzarət baxımından faydalı ola biləcək dörd səhər içkisini təqdim edib.

Su

Qan şəkərinin nəzarətdə saxlanılması üçün ən sadə və etibarlı seçim sudur. Tərkibində karbohidrat və əlavə şəkər olmayan su orqanizmin maye balansının qorunmasına kömək edir. Mütəxəssislər diabeti olan və ya bu xəstəlik riski daşıyan insanlara əsas içki kimi suya üstünlük verməyi tövsiyə edirlər.

Adi su içmək çətindirsə, ona limon və ya laym əlavə etmək mümkündür. Dietoloq Sara Qold Anzlovarın sözlərinə görə, limonlu su həm maye qəbulunu artırır, həm də sitrus meyvələrinin bəzi potensial faydalarından yararlanmağa imkan verir.

Kiçik miqyaslı ilkin araşdırmalar sitrus meyvələrinin turşuluğunun nişastanın parçalanmasını və qana keçməsini müəyyən qədər ləngidə biləcəyini göstərib. Bununla belə, bu təsirin daha geniş tədqiqatlarla təsdiqlənməsinə ehtiyac var.

Yerba-mate

Kofein qəbul etmək istəyənlər üçün yerba-mate alternativ seçim ola bilər. Cənubi Amerikaya məxsus bu içkinin tərkibində kofein, polifenollar və teobromin var. Şəkər əlavə edilmədikdə isə qanda şəkərin kəskin yüksəlməsinə səbəb olan əlavə şəkər ehtiva etmir.

2025-ci ildə dərc edilmiş sistematik icmal və meta-analiz yerba-mate qəbulunun qlükoza nəzarətinin bəzi göstəricilərində yaxşılaşma ilə əlaqəli olduğunu göstərib. Araşdırmada xüsusilə yeməkdən sonrakı qlükoza səviyyəsi və HbA1c göstəricilərində azalma müşahidə edilib.

Latte

Latte də səhər menyusunun bir hissəsi ola bilər, lakin istifadə olunan südün növü əhəmiyyətlidir. Adi inək südü və şəkərsiz soya südü digər bəzi bitki mənşəli süd alternativləri ilə müqayisədə daha çox zülal ehtiva edir.

Zülal yemək və ya içkidən sonra qan şəkərinin daha sürətli yüksəlməsinin qarşısını almağa kömək edə bilər. Buna görə latte hazırlayarkən zülal baxımından zəngin süd seçmək və əlavə şəkərin miqdarını məhdudlaşdırmaq məsləhət görülür.

Protein kokteyli

Protein kokteyli yalnız sürətli səhər yeməyi deyil, həm də qan şəkərinin idarə olunmasını dəstəkləyən seçim ola bilər. Bəzi araşdırmalar zülalla zəngin səhər yeməyinin təsirinin günün sonrakı saatlarına qədər davam edə biləcəyini göstərir.

Dietoloq Karlin Remediosun sözlərinə görə, faydalı protein kokteyli yalnız zülaldan ibarət olmamalı, tərkibində lif və sağlam yağlar da olmalıdır. Bunun üçün protein əlavəsinə yunan yoqurtu, kəsmik və ya şəkərsiz soya südü əlavə etmək olar. Lif mənbəyi kimi giləmeyvələrdən, sağlam yağlar üçün isə çia toxumu, üyüdülmüş kətan toxumu və ya avokadodan istifadə etmək mümkündür.

Mütəxəssislər səhər içkilərində əlavə şəkərin miqdarına diqqət yetirməyi tövsiyə edir. Xüsusilə şəkərli qəhvə, şirin içkilər və yüksək karbohidratlı məhsullar qan şəkərinin sürətlə yüksəlməsinə səbəb ola bilər.

Samir