Çuğundur tərkibindəki təbii nitratlar sayəsində qan dövranını yaxşılaşdırmağa və arterial təzyiqin normada saxlanmasına kömək edə bilər.

HİT.az xəbər verir ki, bu barədə “Health” nəşri məlumat yayıb. Bildirilir ki, çuğundurdakı nitratlar orqanizmdə damarların genişlənməsinə və rahatlamasına kömək edən azot oksidinə çevrilir. Bu da qan dövranına müsbət təsir göstərə bilər.

Mütəxəssislər çuğundurun faydalı xüsusiyyətlərindən maksimum yararlanmaq üçün onu müxtəlif formalarda qəbul etməyi tövsiyə edirlər.

1. Çiy halda - Çiy çuğundur istilik təsirinə məruz qalmadığı üçün vitaminlər, folat və təbii nitratların daha böyük hissəsini qoruyur. Onu salatlara əlavə etmək və ya sürtgəcdən keçirmək mümkündür.

2. Buxarda bişirilmiş - Buxarda bişirmə zamanı tərəvəz suyun içində qalmadığı üçün suda həll olan bəzi vitamin və mineralların itkisi azalır. Bu üsul həmçinin antioksidantların və kaliumun qorunmasına kömək edir.

3. Sobada bişirilmiş - Çuğundurun sobada bişirilməsi onun təbii şirinliyini artırır və qida maddələrinin böyük hissəsinin saxlanmasına imkan verir. Mütəxəssislər bişirmədən əvvəl qabığını soyumamağı məsləhət görürlər.

4. Turşuya qoyulmuş - Turşulama çuğundurun qida dəyərini qorumaqla yanaşı, bağırsaq sağlamlığı üçün faydalı bakteriyaların yaranmasına şərait yarada bilər.

5. Şirə formasında - Çuğundur şirəsi nitratların daha konsentrat mənbəyi hesab olunur. Onun qan dövranını yaxşılaşdırmağa və arterial təzyiqin aşağı düşməsinə kömək edə biləcəyi bildirilir. Bundan əlavə, fiziki məşqdən əvvəl qəbul edilməsi dözümlülüyü artıra bilər.

6. Yarpaqları - Çuğundur yarpaqları da faydalı qida maddələri ilə zəngindir. Onun tərkibində kalsium, dəmir və lif var. Yarpaqları sarımsaq və zeytun yağı ilə qovurmaq, şorbalara və müxtəlif yeməklərə əlavə etmək mümkündür.

Bununla belə, çuğundur yüksək arterial təzyiqin müalicəsini əvəz etmir. Qan təzyiqi ilə bağlı problemi olan şəxslər həkim məsləhətinə uyğun müalicəni davam etdirməlidirlər.

Samir