Süd məhsullarının gündəlik qida rasionuna daxil edilməsi sümük sisteminin möhkəmlənməsinə kömək edir. Çünki bu məhsullar zülal və kalsiumun dəyərli mənbəyidir. 

HİT.az xəbər verir ki, diyetoloq və endokrinoloq Yelena Sürakşinanın “Pravda.Ru” nəşrinə müsahibəsində qeyd etdiyi kimi, bu cür məhsulların seçimi orqanizmin fərdi xüsusiyyətləri nəzərə alınmaqla aparılmalıdır.

Mütəxəssisin sözlərinə görə, kəsmik, yoqurt və kefir maddələr mübadiləsinin və bağırsaq mikroflorasının sağlamlığının qorunması üçün zəruri olan qida maddələri ilə orqanizmi təmin edir. Məhsul seçərkən sənaye emalından minimum dərəcədə keçmiş, tərkibində həddindən artıq şəkər və ya süni əlavələr olmayan məhsullara üstünlük vermək lazımdır.

Pendir istehlak edərkən isə ölçülü olmaq tövsiyə edilir. Bu, xüsusilə hipertoniya xəstəliyindən əziyyət çəkən insanlar üçün vacibdir. Pendirin tərkibində duzun yüksək konsentrasiyası orqanizmdə mayenin yığılmasına səbəb ola və arterial təzyiqə mənfi təsir göstərə bilər.

Tam yağlı südə gəlincə, bu məhsul yalnız istifadəsinə əks-göstərişlər olmadıqda faydalıdır. Mütəxəssis autoimmun xəstəlikləri və ya laktaza çatışmazlığı olan insanlara həzm problemlərinin qarşısını almaq üçün südü qida rasionundan çıxarmağı və ya onu laktozasız analoqları ilə əvəz etməyi tövsiyə edir.

Samir