Maqnezium orqanizmin normal fəaliyyəti üçün vacib minerallardan biridir. O, sinir sisteminin və əzələlərin işini tənzimləməyə, qan təzyiqinin və qanda şəkərin səviyyəsini nəzarətdə saxlamağa kömək edir. Badam maqnezium mənbəyi kimi tanınsa da, bu mineralın daha çox olduğu başqa çərəz və toxumlar da var.

HİT.az xəbər verir ki, “Verywell Health” nəşrinin məlumatına görə, Braziliya qozu, anakardiya və çia toxumu maqneziumla zəngin məhsullar sırasındadır.

1. Balqabaq tumu

28 qram balqabaq tumunda təxminən 156 mq maqnezium var. Bu məhsul həmçinin faydalı yağlar, zülal və liflə zəngindir. Tumlar toxluq hissinin daha uzun müddət davam etməsinə kömək edə bilər.

2. Braziliya qozu

28 qram Braziliya qozu təxminən 105 mq maqnezium ehtiva edir. O, zülal və kalsium mənbəyidir. Lakin bu qozun tərkibində selen də çox olduğundan həddindən artıq istehlakı məsləhət görülmür.

3. Çia toxumu

28 qram çia toxumunda təxminən 95 mq maqnezium mövcuddur. Bu toxum zülal, lif, antioksidantlar və omeqa-3 yağ turşuları ilə də zəngindir.

4. Anakardiya

28 qram anakardiya təxminən 73,7 mq maqnezium verir. Tərkibində zülal, faydalı yağlar və kalsium da var. Araşdırmalar bu çərəzin balanslaşdırılmış qidalanmanın bir hissəsi kimi ürək-damar sağlamlığını dəstəkləyə biləcəyini göstərir.

5. Şam qozası

28 qram şam qozasında təxminən 71,2 mq maqnezium var. Bundan əlavə, bu məhsul zülal, dəmir, sink və E vitamini ilə zəngindir.

6. Fındıq

28 qram fındıq təxminən 49 mq maqnezium ehtiva edir. Fındıq həmçinin E vitamini, lif, zülal və doymamış yağlarla zəngindir. Bu maddələr sağlam qidalanmada mühüm rol oynayır.

7. Yerfındığı

28 qram yerfındığında təxminən 47,6 mq maqnezium var. O, zülal, lif və amin turşuları ilə zəngin olmaqla yanaşı, ürək-damar sağlamlığı üçün əhəmiyyətli hesab edilən bitki mənşəli birləşmələr də ehtiva edir.

8. Qoz

28 qram qoz təxminən 44,8 mq maqneziumla təmin edir. Qozun tərkibində omeqa-3 yağ turşuları, zülal, lif və antioksidantlar da mövcuddur. Bu maddələr ürək və beyin sağlamlığının qorunmasında əhəmiyyətli ola bilər.

9. Makadamiya qozu

28 qram makadamiya təxminən 33,5 mq maqnezium ehtiva edir. Bu çərəz həmçinin doymamış yağlar, zülal, kalsium və fosfor mənbəyidir.

Məlumata görə, maqneziuma gündəlik ehtiyac yaşa və cinsə görə dəyişir. 19–30 yaşlı kişilər üçün gündəlik norma 400 mq, qadınlar üçün isə 310 mq təşkil edir. 31 yaşdan yuxarı kişilərə gündə 420 mq, qadınlara isə 320 mq maqnezium tövsiyə olunur.

Mütəxəssislər maqnezium ehtiyacını qarşılamaq üçün qoz-fındıq və toxumları balanslaşdırılmış qidalanmaya daxil etməyi məsləhət görürlər. Bununla belə, bu məhsulların yüksək kalorili olduğunu və xüsusilə Braziliya qozunun selenlə zənginliyini nəzərə almaq vacibdir.

Samir