Gündəlik qəhvə istehlakının sümük sağlamlığına təsirini araşdıran alimlər müəyyən ediblər ki, bu içkinin həddindən artıq qəbulu sümük mineral sıxlığının azalması ilə əlaqəli ola bilər. Xüsusilə gündə beş fincandan çox qəhvə içən qadınlarda bu ehtimal diqqət çəkib. Bununla belə, tədqiqat qəhvənin birbaşa sümük zəifliyinə səbəb olduğunu sübut etmir.
HİT.az xəbər verir ki, bu barədə UNIAN “Verywell Health” nəşrinə istinadən məlumat yayıb.
“Nutrients” jurnalında dərc olunan araşdırmada yaşı 65-dən yuxarı olan 9700-dən çox qadının məlumatları təhlil edilib. Alimlər iştirakçıların qəhvə və çay istehlakını izləyib, təxminən 10 il ərzində onların sümük mineral sıxlığını bir neçə dəfə ölçüblər.
Sümük mineral sıxlığı sümüklərdə kalsium kimi mineralların miqdarını göstərir. Bu göstəricinin aşağı olması sümüklərin zəifləməsi və osteoporoz, eləcə də sınıq riskinin artması ilə əlaqəli ola bilər.
Araşdırma nəticəsində orta miqdarda qəhvə içməklə bud-çanaq oynağı və bud sümüyünün boyun hissəsindəki mineral sıxlıq arasında statistik baxımdan əhəmiyyətli əlaqə aşkarlanmayıb. Lakin gündə beş fincandan artıq qəhvə içən qadınlarda sümük sıxlığının daha aşağı olması ehtimalı müəyyən edilib.
Cons Hopkins Universitetinin Sümük Metabolizmi Xəstəlikləri və Osteoporoz Mərkəzinin tibbi direktoru Kendall Mozli bu nəticələrin qəhvənin sümük sağlamlığına mənfi təsirini qəti şəkildə sübut etmədiyini bildirib. Onun sözlərinə görə, müşahidə olunan əlaqənin səbəblərini müəyyənləşdirmək üçün əlavə araşdırmalar aparılmalıdır.
Alimlər çay istehlakı ilə bağlı da müəyyən nəticələr əldə ediblər. Çay içən qadınlarda bud-çanaq nahiyəsinin sümük mineral sıxlığı bir qədər yüksək olub. Lakin fərq çox kiçik olduğundan bunun ayrı-ayrı insanlar üçün əhəmiyyətli üstünlük sayılması mümkün deyil.
Qəhvə sümükləri niyə zəiflədə bilər?
Mütəxəssislərin fikrincə, kofein sidiklə kalsium itkisini müəyyən qədər artıra bilər. Bu isə nəzəri olaraq sümük sağlamlığına təsir göstərə bilər. Bununla belə, qidalanma zamanı kifayət qədər kalsium qəbul edilməsi həmin itkinin kompensasiya olunmasına kömək edə bilər.
Araşdırmanın mühüm məhdudiyyəti onun müşahidə xarakteri daşımasıdır. Yəni tədqiqatçılar iştirakçılara müəyyən miqdarda qəhvə içməyi tapşırmayıb, sadəcə mövcud məlumatları təhlil ediblər. Siqaret, alkoqol, fiziki aktivlik, bədən çəkisi, kalsium və D vitamini qəbulu kimi amillər də nəticələrə təsir göstərə bilər.
Stenford Universitetinin Tibb fakültəsinin endokrinologiya üzrə klinik dosenti Müril Babey hesab edir ki, nəticələr orta miqdarda qəhvə içən insanlar üçün narahatlıq yaratmamalıdır. Onun fikrincə, yalnız çox yüksək istehlak səviyyəsində müşahidə olunan əlaqə əlavə araşdırmaya ehtiyac duyur.
Mütəxəssislər bildirirlər ki, sağlam insanların sümük sağlamlığı ilə bağlı narahatlığa görə qəhvədən tamamilə imtina etməsi üçün hazırda kifayət qədər əsas yoxdur. Bunun əvəzinə, balanslı qidalanmaya, kalsium və D vitamini qəbuluna, fiziki aktivliyə diqqət yetirmək, həmçinin siqaretdən uzaq durmaq tövsiyə olunur.
Qeyd edək ki, araşdırma yalnız 65 yaşdan yuxarı qadınları əhatə etdiyindən nəticələri kişilərə və daha gənc insanlara birbaşa şamil etmək olmaz. Gündə beş fincandan çox qəhvə içənlər üçün istehlak miqdarını nəzərdən keçirmək faydalı ola bilər, lakin bu tədqiqat qəhvənin mütləq sümük zəifliyinə səbəb olduğunu göstərmir.
Samir
