Yulaf sıyığı qidalı tərkibi və yüksək lif miqdarı ilə sağlam qidalanmanın vacib hissəsi hesab olunur. O, çəkiyə nəzarət etməyə, həzm sisteminin fəaliyyətini dəstəkləməyə və qanda xolesterinin səviyyəsini azaltmağa kömək edə bilər. Dietoloqların fikrincə, yulafın günün hansı saatında yeyilməsi bəzi faydalar baxımından əhəmiyyət daşısa da, əsas məsələ onun müntəzəm və düzgün qidalanma rejiminə uyğun istehlak edilməsidir.
HİT.az-ın Health.com nəşrinə istinadən verdiyi məlumata görə, yulaf sıyığını günün müxtəlif vaxtlarında yemək mümkündür. Bununla belə, məqsəd arıqlamaq, qan şəkərinə nəzarət etmək və ya həzm sisteminin fəaliyyətini yaxşılaşdırmaq olduqda bəzi məqamlara diqqət yetirmək tövsiyə edilir.
Həzmi yaxşılaşdırmaq üçün
Yulaf sıyığı liflə zəngin olduğu üçün bağırsaqların fəaliyyətini dəstəkləyir, nəcisin müntəzəm xaric olunmasına kömək edir və qəbizlik riskini azalda bilər. Tərkibindəki beta-qlükan adlı həll olunan lif isə faydalı bağırsaq bakteriyalarının qidalanmasına şərait yaradır. Bu da həzm sisteminin və ümumi sağlamlığın qorunmasında rol oynayır.
Yulafı günün istənilən vaxtında yemək mümkün olsa da, bəzi insanlar üçün onu səhər saatlarında istehlak etmək daha rahatdır. Çünki lifli qidalar xüsusilə həssas həzm sisteminə malik insanlarda köp və qaz yaranmasına səbəb ola bilər.
Arıqlamaq istəyənlər üçün
Günə yulaf sıyığı ilə başlamaq çəkiyə nəzarət baxımından faydalı seçim ola bilər. Yulafın tərkibindəki lif toxluq hissini daha uzun müddət saxlamağa və gün ərzində həddindən artıq qida qəbulunu azaltmağa kömək edir. Beta-qlükan həzmi müəyyən qədər ləngidərək aclıq hissinin daha gec yaranmasına şərait yaradır.
Məqalədə qeyd olunan araşdırmalardan birində səhər yeməyində yulaf sıyığı yeyən iştirakçıların digər səhər yeməyi seçimlərinə üstünlük verənlərlə müqayisədə özlərini daha tox hiss etdikləri və naharda daha az kalori qəbul etdikləri bildirilir.
Bununla belə, yulaf sıyığının özü avtomatik olaraq arıqlamağa zəmanət vermir. Nəticə ümumi qidalanma, porsiyanın ölçüsü və fiziki aktivlikdən də asılıdır. Sıyığa çoxlu şəkər, şirin siroplar və digər yüksək kalorili əlavələr qatmaq onun bu baxımdan faydasını azalda bilər.
Qan şəkərinə nəzarət üçün
Yulaf sıyığını səhər yeməyində istehlak etmək qanda şəkərin səviyyəsinin idarə olunmasına kömək edə bilər. Onun tərkibindəki beta-qlükan karbohidratların həzmini və qlükozanın sorulmasını ləngidə bilər. Nəticədə qan şəkərinin yüksəlməsi bəzi digər səhər yeməyi seçimləri ilə müqayisədə daha tədricən baş verə bilər.
Araşdırmalara əsasən, səhər yulaf yemək orqanizmin gün ərzində sonrakı yeməklərdə qəbul edilən karbohidratlara reaksiyasına da müsbət təsir göstərə bilər. Bu hadisə elmi ədəbiyyatda “ikinci yemək effekti” adlandırılır.
Lakin nəticə yulafın növündən, hazırlanma üsulundan və ona əlavə edilən məhsullardan asılıdır. Şəkərli, yüksək dərəcədə emal olunmuş yulaf məhsulları eyni təsiri göstərməyə bilər. Diabeti olan şəxslər isə yulafı fərdi qidalanma planlarına uyğun qəbul etməlidirlər.
Xolesterini azaltmaq üçün
Yulaf sıyığını xolesterinin səviyyəsini azaltmaq məqsədilə yemək üçün günün xüsusi saatı müəyyən edilməyib. Burada əsas amil onun müntəzəm istehlakıdır.
Yulafda olan həll olunan lif həzm sistemində öd turşularının xaric olunmasına kömək edir. Bunun nəticəsində qaraciyər yeni öd turşuları yaratmaq üçün qandakı xolesterindən istifadə edir. Bu proses aşağı sıxlıqlı lipoproteinlərin (LDL), yəni “pis” xolesterinin azalmasına şərait yarada bilər.
Araşdırmalara görə, gündə təxminən 3 qram beta-qlükan qəbul etmək LDL xolesterinin səviyyəsini müəyyən qədər aşağı sala bilər. Məqalədə bu miqdar təxminən 1,5 stəkan yulafla əlaqələndirilir. Lakin beta-qlükanın dəqiq miqdarı məhsulun növünə və porsiyanın ölçüsünə görə dəyişir.
Beləliklə, yulaf sıyığını səhər yeməyində istehlak etmək toxluq hissini qorumaq və qan şəkərinə nəzarəti dəstəkləmək üçün əlverişli seçimdir. Xolesterinin azaldılması və həzmin yaxşılaşdırılması baxımından isə günün konkret saatından daha çox, yulafın müntəzəm qəbulu və ümumi qidalanma vərdişləri əhəmiyyət daşıyır.
Samir
