Kök şirəsi tərkibindəki vitaminlər, minerallar və antioksidantlarla orqanizm üçün faydalı içkilərdən biri hesab olunur. Dietoloqlar bu içkinin immun sisteminin fəaliyyətini dəstəklədiyini, gözlərin sağlamlığını qorumağa, ürəyin normal fəaliyyətinə və orqanizmin su balansının tənzimlənməsinə kömək etdiyini bildirirlər.

HİT.az xəbər verir ki, bu barədə “Martha Stewart” nəşri məlumat yayıb.

Mütəxəssislərin sözlərinə görə, kök şirəsi A və C vitaminləri, beta-karotin və kaliumla zəngindir. Bu maddələr orqanizmin müxtəlif funksiyalarının normal fəaliyyəti üçün əhəmiyyətlidir. İçkidən daha çox fayda əldə etmək üçün əlavə şəkərsiz variantlara üstünlük vermək, imkan daxilində isə onu ev şəraitində hazırlamaq tövsiyə olunur.

İmmuniteti dəstəkləyir

Kök şirəsindəki A və C vitaminləri immun sisteminin normal fəaliyyətində mühüm rol oynayır. Dietoloq Lina Bəqdaçenin sözlərinə görə, A vitamini tənəffüs yollarının və mədə-bağırsaq traktının selikli qişalarını qorumağa, orqanizmin infeksiyalara qarşı müdafiəsini dəstəkləməyə kömək edir. C vitamini isə antioksidant xüsusiyyətləri sayəsində immun hüceyrələrini oksidləşdirici stresdən qoruyur.

Gözlərin sağlamlığına faydalıdır

Kökün tərkibindəki beta-karotin orqanizmdə A vitamininə çevrilir. Bu vitamin normal görmə, xüsusilə zəif işıq şəraitində görmə qabiliyyəti üçün vacibdir. Dietoloq Samanta Kuqanın sözlərinə görə, beta-karotin həmçinin gözləri oksidləşdirici stresdən qorumağa kömək edir.

Ürəyin fəaliyyətini dəstəkləyir

Kök şirəsində olan kalium qan təzyiqinin tənzimlənməsinə, damarların normal fəaliyyətinə və ürək ritminin qorunmasına kömək edir. Beta-karotin isə oksidləşdirici stresin və iltihabın azalmasında rol oynayır. Bundan əlavə, kökdəki təbii nitratlar orqanizmdə azot oksidinə çevrilərək damarların genişlənməsinə və qan dövranının yaxşılaşmasına töhfə verə bilər.

Orqanizmin su balansını qoruyur

Kökün böyük hissəsi sudan ibarətdir. Buna görə də ondan hazırlanan şirə gündəlik maye qəbulunun artırılmasına kömək edə bilər. Tərkibindəki kalium və az miqdarda natrium da su-elektrolit balansının qorunmasında iştirak edir. Bununla belə, kök şirəsi adi suyu tam əvəz etmir.

Mütəxəssislər içkini şirəçəkən və ya blender vasitəsilə hazırlamağı, dadını zənginləşdirmək üçün alma, limon və ya zəncəfil əlavə etməyi məsləhət görürlər. Şirə seçərkən əlavə şəkərin az olmasına diqqət yetirmək vacibdir.

Samir