Gürcüstan azərbaycanlılarının sıx yaşadığı Marneuli rayonunda “İşğala son, Qarabağa azadlıq, sonra sülh” adlı aksiya keçirilib.

HİT.Az xəbər verir ki, Diasporla İş üzrə Dövlət Komitəsindən verilən məlumata görə, aksiya Gürcüstan Azərbaycanlılarının İnteqrasiya Mərkəzinin qarşısında baş tutub. Aksiyanın təşkilatçıları “Borçalı İrəli ictimai Birliyi”nin sədri Məhəbbət İmanov və Gürcüstanın azərbaycanlı hüquqşunaslar assosiyasiyasının sədri Əli Bədirovdur.

Tovuz cəbhəsində qəhrəmanlıqla həlak olan şəhidlərimizin əziz xatirəsinin bir dəqiqəlik sükutla anıldığı tədbirdə Gürcüstan parlamentinin üzvü Azər Süleymanov, Marneuli məscidinin axundu Hacı Hacıyev, axund Hacı Əziz, Gürcüstan Müsəlmanları Ali Dini İdarəsinin sədri və şeyxi Mirtağı Əsədov, ictimai xadim İsrafil Bayramov, parlamentin keçmiş üzvü Hidayət Hüseynli və digərləri çıxış ediblər. Natiqlər Azərbaycan və Gürcüstanın işğal altındakı ərazilərinin azad edilməsinin vacibliyini bildirərək, dünya birliyini və beynəlxalq təşkilatları bu istiqamətdə qətiyyətli addımlar atmağa çağırıblar.

Azərbaycan və Gürcüstanın dövlət bayraqlarının dalğalandığı aksiyada “Qarabağ Azərbaycandır”, “Xocalıya Ədalət”, “Abxaziya və Samaçablo Gürcüstanındır”, “Ermənistanın işğalçı siyasətinə son qoyulsun!”, “Şəhidlərin xatirəsinə ehtiram”, “Qəhrəman oğullar yetişdirən analara görə qürur duyuruq!” və s. şüarların yazıldığı plakat və bannerlər nümayiş etdirilib.