“Azərbaycanın əlinə batan tikanı Türkiyə ürəyində hiss edər”.

Bu sözləri Türkiyə Prezidentinin baş müşaviri Yalçın Topçu deyib.

Azərbaycan-Ermənistan sərhəd xəttindəki gərginliklə bağlı danışan Y.Topçu bildirib ki, Nemes-Daşnaq-Xınçaq-Asala zehniyyəti ilə hərəkət edən Ermənistan hökuməti öz xalqını yoxsulluq və qeyri-sabitliyə məhkum etmək bahasına BMT-nin qətnamələrini tanımır və işğal etdiyi Dağlıq Qarabağdan çəkilməməklə yanaşı, Tovuz bölgəsində təxribatlar törətməyə çalışır: “Ermənistan Azərbaycan ilə Türkiyənin yeganə quru yolunu da ələ keçirib iki ölkənin ortaq enerji nəqliyyatı xətlərinə nəzarət etmək istəyir. Ermənistanın öz xalqına yaşatdığı siyasi və iqtisadi böhran bu cür hücumları ört-basdır etmək və iqtidarına davam etmək niyyəti daşıyır”.

O bildirib ki, Prezident Rəcəb Tayyib Ərdoğanın “bu hücumlar Ermənistanın boyunu aşar. Məqsəd həm Dağlıq Qarabağda həll yolunu tıxamaq, həm də yeni toqquşma ortaya çıxarmaqdır. Türkiyə Azərbaycanın haqqına, hüququna, torpaqlarına qarşı hər növ hücumun qarşısında yer almaqda əsla tərəddüd etməyəcək” bəyanatı türk dövləti və millətinin mövqeyinin ifadəsidir.

Y.Topçu vurğulayıb ki, BMT və Avropa İttifaqı Ermənistana qarşı bölgənin və dünyanın sülhü üçün dərhal lazımi mövqeyi sərgiləməlidir.