Rusiya Prezidenti Vladimir Putin Dağlıq Qarabağda humanitar məsələlərin həlli məsələsi üzrə video-toplantı keçirib.

TASS xəbər verir ki, Putin bundan sonra “Dağlıq Qarabağ münaqişəsi” ifadəsinin işlədilməsinə ehtiyac olmadığını bildirib.

 “Ümid edirəm ki, biz artıq bundan sonra “Dağlıq Qarabağ münaqişəsi” ifadəsindən istifadə etməyəcəyik. Tezliklə digər məsələləri müzakirə etməyə davam edəcəyik. Onlardan biri, əlbəttə daha əhəmiyyətlidir”, - deyə Putin humanitar mövzuya diqqət çəkib.

O bildirib ki, Dağlıq Qarabağın mülki əhalisinin əlavə yardıma ehtiyacı var. Rusiya Prezidenti, həmçinin, vurğulayıb ki, Dağlıq Qarabağda atışma və toqquşmalar tamamilə dayandırılıb. O deyib ki, Dağlıq Qarabağda ölənlərin sayı 4 mindən çoxdur, yaralıların sayı isə 8 mini ötüb.

Putin Rusiya Federasiyasının Dağlıq Qarabağdakı vəziyyətə humanitar reaksiya verməsi üçün Qurumlararası Humanitar Yardım Mərkəzinin yaradılmasını təklif edib. O, bu mərkəzə beynəlxalq dəstəyin də olacağına ümid etdiyini vurğulayıb.

Sonda Putin bununla bağlı fərman imzalayıb. Fərmana əsasən, Humanitar Yardım Mərkəzinə Fövqəladə Hallar Nazirliyi, Xarici İşlər Nazirliyi, Federal Təhlükəsizlik Xidməti daxil ediləcək. Təşkilati məsələlər isə Müdafiə Nazirliyinə həvalə olunub.

“Ümid edirəm ki, mərkəzin fəaliyyəti bütün bu strukturlar tərəfindən tam dəstəklənəcək. BMT-nin Qaçqınlar üzrə Ali Komissarlığı, YUNESKO ilə də konstruktiv, tam hüquqlu bir iş qurmaq lazımdır. Müstəqil Dövlətlər Birliyinin də dəstəyinə və töhfəsinə ümid edirik. Bu vacib işin bütün mümkün iştirakçıları ilə sıx qarşılıqlı əlaqə saxlayacağıq”, - deyə Putin qeyd edib.