10 noyabr 2020-ci il tarixində Azərbaycan və Rusiya prezidentləri və Ermənistanın baş naziri arasında üçtərəfli bəyanat imzalandı. Bundan sonrakı mərhələdə hərbi əməliyyatların dayandırılması, bölgədə sülh, təhlükəsizlik və əməkdaşlığın yaradılması müəyyənləşdirildi. Bununla yanaşı, 11 yanvar 2021-ci il tarixində Moskvada imzalanmış üçtərəfli sənəd də yeni yaranmış mövcud reallığı dəyərləndirərək, gələcəyə doğru istiqamətlənmiş məsələlərə fokuslandı. Beləliklə də, bir daha məlum oldu ki, status məsələsi birdəfəlik tarixə qovuşdu və Azərbaycan diqtə edən, regionda yeni reallıq yaradan ölkədir.
HİT.Az xəbər verir ki, bunu politoloq Şəbnəm Həsənova deyib.
Ş.Həsənova bildirib ki, bu çərçivəyə tamamilə zidd olaraq, eyni zamanda gərginliyi alovlandırmağa cəhd göstərək Ermənistan xarici işlər naziri Ara Ayvazyan və regionda yaranmış yeni geosiyasi reallığı qəbul etmək istəməyən bəzi dairələr, daha dəqiq desək bir neçə gün əvvəl Fransadan keçmiş bələdiyyə sədrlərindən birinin rəhbərliyi ilə bir qrup jurnalist, ictimai xadim Qarabağa doğru üz tutdular:
“Sülhməramlılar onları Laçında dayandırarkən qrup Qarabağa getdiyini və Ermənistanda akkreditasiyadan keçdiklərini deyir. Sülhməramlılar isə onların Azərbaycan ərazisinə getdiklərini, Ermənistanda alınan akkreditasiyanın etibarsız olduğunu söyləyərək onların girişlərini qadağan edir və bildirirlər ki, Qarabağa daxil olmaq istəyirlərsə, Azərbaycanda akkreditasiyasından keçsinlər. Ediləcək bir şeyin olmadığını görən nümayəndə heyəti Yerevana, Fransa səfirinin yanına qayıdır. Fransa səfiri Jonathan Lakot isə qeyri-rəsmi olaraq Nikol Paşinyanla əlaqə qurur. Paşinyan isə ona cavab verir ki, “bəli, 11 yanvarda beynəlxalq medianın səfərləri zamanı onların Azərbaycan akkreditasiyasını alması barədə razılığa gəlinib”.
Məsələ aydındır. Beləliklə də, Qarabağa icazəsiz səfərlərin qarşısının alınması Azərbaycanın prinsipiallığının nəticəsidir. Belə ki, bu məsələ ilə bağlı daim prinisipiallıq, qətiyyət və siyasi iradə nümayiş etdirən cənab Prezident İlham Əliyev 6 yanvar 2021-ci il tarixində keçirilmiş ötən ilin yekunlarına dair müşavirədə bildirdi ki, Azərbaycan sülhməramlı qüvvələr qarşısında məsələ qoyub. Azərbaycanın icazəsi olmadan heç bir xarici vətəndaş Dağlıq Qarabağa gedə bilməz”.
Politoloq qeyd edib ki, daha öncə belə bir hal yaşanmışdı və Fransa səfiri Azərbaycanın Xarici İşlər Nazirliyinə çağırıldı, nota verildi:
“Bundan sonra da Azərbaycan səssiz qalmayacaq. İndiki mərhələdə münasibətlərin normallaşdırılması istiqamətində addımlar atılır, bunu Ermənistan da, digər dairələr də qəbul etməlidirlər. Bütün dünya bu ərazini Azərbaycanın ayrılmaz hissəsi kimi tanıyır. Azərbaycanın icazəsi olmadan heç bir xarici vətəndaş, Beynəlxalq Qırmızı Xaç Komitəsi istisna olmaqla heç bir beynəlxalq təşkilat o əraziyə gedə bilməz. Bu tamamilə qanunazidd bir hərəkətdir. İstənilən xarici dövlətin vətəndaşı Qarabağa səfər edərkən mütləq mənada Azərbaycandan icazə almalıdır”.
