Son günlər Ermənistanın Baş naziri N.Paşinyanın ərazi mübadiləsi və mübahisəli ərazilər, sərhədlərin demarkasiyası prosesi ilə bağlı səsləndirdiyi fikirlər cəmiyyət arasında da birmənalı qarşılanmayıb.

“Gədəbəy rayonunun Başkənd kəndinin mübahisəli ərazi kimi qeyd edilməsi isə Şınıx bölgəsinin yenidən blokadaya düşməsinə səbəb ola bilər.”

Bunu Araşdırmaçı Jurnalistlər Liqasının baş katibi, əslən həmin regiondan olan Şəfayət Avılbəyli məsələ ilə bağlı HİT.Az-a açıqlamasında bildirib. Onun sözlərinə görə, bu bölgənin insanlarının birinci Qarabağ savaşında min əziyyətlərə qatlaşdığını qeyd edib: "Torpaqlarımız zaman-zaman parçalanaraq ermənilərə veriləndə Başkənd də bu siyasi avantüranın qurbanı olub. 1992-ci ilə kimi bu kənd quldur yuvası rolunu oynayıb. Və nəhayət, 1992-ci ildə Başkənd erməni quldurlarından təmizlənərək, əzəli sahiblərinə qovuşub. Hansı erməni torpağından söhbət gedə bilər?”, - deyə o sual edib.

Şəfayət Avnıbəyli bildirib ki, 1920-ci ildən sonra tarixə nəzər saldıqca qarış-qarış ermənilər bütün sərhəd boyu torpaqlarımıza giriblər: “SSRİ rəhbərliyinin arxasına sığınaraq, min bir hiylələrlə, iddialarla ancaq bizlərdən torpaq qoparıblar. Nümunələr çoxdur. Məhz Şınıx inzibati ərazisi hesab edilən Tağılar kəndi  bu qəbilədən deyilmi? 1969-cu ilin noyabr ayının 17-də imzalanmış 3 bənddən ibarət razılaşma əsasında Tağılar kəndi Ermənistana verilib".

Eyni ssenarilər digər sərhəd bölgələrimizdə də baş verib: “Mən sadəcə Gədəbəyin sərhəd bölgələrində 1987-ci ildə ermənilər tərəfindən traktorlarla bir ayın içində o bölgədə sərhəd şırımı çəkmələrinə diqqət yetirirəm. Mənim yaşıdlarım və o bölgədə yaşayanlar bu tarixi hadisəni yaxşı xatırlayarlar. O zaman sərhəd çəkiləndə yenə sapı özümüzdən olan baltalar  “Kor Vəli”, ”Seyidin qəbri”, “Qaranlıq dərə”, “Acı qoyuqluq” adlanan hektarlarla biçin və otlaq yerlərimizi ermənilərə verdilər. Həmin il ot biçənlər bu ədalətsizliyə qarşı çıxaraq Rayon Partiya Komitəsinin xidməti maşınlarını yandırdılar. Həmin ərazilərin ermənilərə verilməsinə qarşı çıxdılar.

“Ziyadın dəstəsi” deyilən bir qrup var idi. Ot tədarükü üçün əvvəllər kolxozlarda bu kimi ot biçən qrupları yaradılırdı. Demək olar ki, bu hadisədən məsul tutaraq həmin qrupun üzvlərini rayon polisində gün verib, işıq vermədilər.1988-ci ildən sonra münaqişə başlayandan sonra artıq hər şey aydın olmuşdu. İndi o otlaq sahələridə erməni ərazisi kimi qalmaqdadır. Ona görə də yenidən Başkəndə ermənilərin qayıtması Şınıx bölgəsi üçün real təhlükədir”.

VÜQAR