“Gürcüstandakı azərbaycanlılar həmişə mövcud hakimiyyətə münasibətdə loyallıqları, ölkənin ərazi bütövlüyünün qorunmasında göstərdikləri fədakarlıqla fərqləniblər. Onlar heç vaxt separatçılığa, bölücülüyə müsbət münasibət bəsləməyiblər”.
HİT.Az xəbər verir ki, bunu Oxu.Az-a açıqlamasında politoloq Qabil Hüseynli Marneulidə Azərbaycanın görkəmli dövlət xadimi Nəriman Nərimanovun abidəsinin sökülməsi tələbinə münasibət bildirərkən deyib.
Marneulidə N.Nərimanovun heykəli 1983-cü ildə ucaldılıb. Həmin vaxtdan heç bir bərpa işləri aparılmadığından, abidə qəzalı və baxımsız vəziyyətə düşüb.
Bu yaxınlarda abidənin təmir-bərpa işləri Marneulinin icra başçısı Zaur Darğallının təşəbbüsü ilə həyata keçirilib.
Amma bu, Marneuli və Hucabi yepiskopu Georginin qəzəbinə səbəb olub. Din xadiminin fikrincə, Nərimanov Gürcüstanın ərazi bütövlüyünün pozulmasında böyük rol oynayıb və hakimiyyətə abidənin sökülməsi üçün bir həftə vaxt verib.
Ekspert Qabil Hüseynli qeyd edib ki, son zamanlar gürcülərin içərisində bəzi radikal millətçilik əhval-ruhiyyəsi yayan təxribatçı şəxslər peyda olub.
Onun sözlərinə görə, həmin millətçilər gürcülərin azərbaycanlılarla müqayisədə üstünlüyünü təbliğ edir və uzağa gedən təhlükəli şüarlar səsləndirirlər.
“Gürcüstan kimi demokratiyanın inkişaf etdiyi ölkədə millətçilik azarını yayanlar, sözsüz ki, Gürcüstanın özünə qarşı çıxış etmiş olurlar”, - deyə Q.Hüseynli əlavə edib.
N.Nərimanovun Marneulidəki heykəlinin sökülməsi tələblərinin səsləndiyi bir zamanda paralel olaraq Kvemo Kartli və Kaxeti bölgələrində gürcülər və azərbaycanlılar arasında ədavəti qızışdırmağa cəhdlər edilir.
Gürcüstanın Dövlət Təhlükəsizlik Xidmətinin yaydığı məlumatda bildirilir ki, həmin şəxslər etnik azərbaycanlıların sıx yaşadıqları bölgələrdə illər ərzində toplanmış problemlərdən təhrif olunmuş vətənpərvərlik düşüncələrinə əsaslanaraq mənfi kontekstdə istifadə edirlər.
DTX-nin Dövlət Təhlükəsizliyi Departamenti irqi ayrı-seçkilik, insan haqlarının birbaşa və ya dolayı şəkildə məhdudlaşdırılması, milli zəmində düşmənçilik və diskriminasiya, milli şərəf və ləyaqətin alçaldılması maddələri üzrə istintaqa başlayıb.
Politoloq Q.Hüseynli söyləyib ki, Gürcüstanın xüsusi xidmət orqanları şovinist qüvvələri cəmiyyətdən təcrid etməyə çalışırlar.
O, proseslərin mənfi məcraya yönəlməsində erməni faktorunun da rolunu istisna etməyib:
“Belə məlumatlar var ki, Gürcüstanda təxminən bir milyona yaxın erməni uzun illər boyu assimilyasiyaya uğrayaraq, gürcü soyadlarını qəbul ediblər. Ancaq onlar erməni kimi qan yaddaşlarını unutmayıblar. Belə adamlar Azərbaycan-Gürcüstan münasibətlərinə xələl gətirmək niyyətindədirlər. Azərbaycanlılarla gürcülər arasında qarşıdurma yaratmağa çalışanlar arasında xeyli vəzifəli şəxslər də var”.
Politoloqun fikrincə, Azərbaycan-Gürcüstan münasibətlərinin korlanmasında maraqlı olan üçüncü qüvvənin – “beşinci kolon”un da əli var.
“Son zamanlar Gürcüstandakı “beşinci kolon”a təlimat gəlib ki, ölkədə qarşıdurma yaratsın. Eyni zamanda, bölgədə strateji xarakter daşıyan Azərbaycan-Gürcüstan münasibətlərini korlamağı qarşılarına məqsəd qoyublar.
Müəyyən din xadimlərinin proseslərə cəlb olunması və qızışdırıcı rol oynaması da təsadüfi deyil. Gürcüstanın hakimiyyət orqanları baş verən hadisələrin siyasi anatomiyasını çox gözəl dərk edir”, - deyə Q.Hüseynli şərhində bildirib.
