Hər bir insanın ətrafında futbol azarkeşləri var. 

Bəzən isə azarkeşliyin qədərini keçən şəxslər də olur. Onlar, fanatikcəsinə hansısa futbol klubuna bağlanırlar. Belə insanlar klubu o qədər çox sevirlər ki, hətta onun uğrunda öz yaxınları və sevdikləri ilə belə dalaşırlar. Buna görə də belə həddindən artıq sevgi onların ətrafları tərəfindən birmənalı qarşılanmır. Bir çox hallarda da onların psixoloji problemləri olduğu düşünülür. 

Maraqlıdır, fanatik dərəcəsinə futbol klubuna azarkeşlik etmək psixoloji problem sayılır? 

Mövzu ilə bağlı psixoloq Nabat Mirzəyeva Hit.az-a açıqlama verib. O bildirib ki, hər bir insanın azarkeşlik etmək haqqı var:

"Əgər bir insan normal şəkildə azarkeşlik edirsə, burada hansısa qəbahət yoxdur. Lakin azarkeşliyi ətrafındakı insanlara, işinə və həyatına zərbə vurursa, bu, psixoloji problemdir. Çünki komandaya olan sevgiyə görə münasibətlərin pozulması normal deyil.". 

Ekspert qeyd edib ki, bəzi hallarda həddindən artıq dərəcədə azarkeşlik ciddi fəsadlara gətirib çıxarır:

"Fanatik insanlar komandaya olan böyük sevgiləri səbəbindən özlərini itirərək davranışlarına nəzarət edə bilmirlər. Hətta bir çox hallarda həmin futbol klubundan asılı hala gəlirlər. Həyatlarını o komandaya və matçlara uyğunlaşdırırlar. Bu isə əlbəttə ki, psixoloji gərginliyə səbəb olur".

Nabat Mirzəyeva vurğulayıb ki, belə şəxslər sanki həyatlarını sevdikləri komandaya qurban verirlər:

"Hətta komandaları məğlub olanda qarşı tərəfi günahlandırmağa başlayırlar və onlara qarşı haqsızlıq edildiyini düşünürlər. Ümumiyyətlə, komandaları qalib gələndə xoşbəxt olurlar, məğlub olduqda isə dərin depressiya keçirirlər. Yəni əhvallarını matçların nəticələrinə əsasən müəyyənləşdirirlər. Sözsüz ki, bu da sağlam yanaşma deyil və psixoloji problemdir".

Pərviz