"Sevgili olan bəzi cütlüklər bir-birilə uyğun olmasalar belə ayrılmırlar". 

Bu sözləri psixoloq Nabat Mirzəyeva Hit.az-a açıqlamasında deyib. 

O, bunun səbəblərindən bəhs edib:

"Yəni bəziləri sevgili olduqları dönəmdə uyğun olmadıqlarını görsələr, incisələr və ya toksik münasibət yaşasalar belə ayrılmaq istəmirlər. Ona görə də bu toksik münasibət hesab olunur. 
 
Lakin bunun səbəbini keçmişdə axtarmaq lazımdır. Gələcəkdə verdiyimiz qərarlar uşaq vaxtı yaşadığımız hekayələrlə çox bağlantılıdır. Yəni yaşadığımız hekayələr bizim toksik münasibətə yönəlməyimizə səbəb olur". 

Ekspert fikirlərini belə əsaslandırıb:

"Uşaq vaxtı atayla, anayla, yaxud da digər böyük şəxslərlə yaranan sevgi bağı nə dərəcədə olubsa, o gələcəkdəki sevgili münasibətlərimizə təsir edir. Yəni istənilən sevgi bağı gələcəkdəki sevgili dönəmlərimizdə də özünü biruzə verir. 

Ümumiyyətlə, yaşanılan hər bir problem üçün keçmişə baxmaq lazımdır. Onu da nəzərə almaq lazımdır ki, hər insan fərqli keçmişə sahibdir. Əgər daim problemli münasibətlər yaşanırsa və bu çözülmürsə, mütləq şəkildə keçmişə baxaraq səbəbi anlaya bilərik".

Psixoloq vurğulayıb ki, bəzi insanlar qarşı tərəfə çox bağlandığı üçün ayrıla bilmirlər:

"Bir çox insan sevgilisinə bağlandıqdan sonra hər olur-olsun ayrılığı qəbul etmək istəmir. Çünki bu qədər əmək verdikdən, əziyyət çəkdikdən sonra həyatındakı şəxsin onu tərk etməsini həzm edə bilmir. Bir növ böyük mübarizədən sonra ayrılmaq istəmirlər. Həmçinin, problemlərin həll olacağına ümid etdikləri üçün dözürlər".

Nabat Mirzəyevanın sözlərinə görə, bəzi şəxslər isə ayrılmaqdan qorxur:

"Düşünürlər ki, "Əgər bu insan gedərsə, mən tək qalacam", "Məni başqa heç kim sevməyəcək" , "Kimsə mənə dəyər verməyəcək". Bu qorxular isə nə qədər toksik olsa belə, insanı münasibətdə saxlayır. Bəzən də "maddi asılılıq" ayrılığa əngəl olur. Həmin insan maddi dəstək verirsə, ondan ayrıla bilmir. Çünki maddi çətinliklə üzləşəcəyini düşünür".  

Mütəxəssis sözlərini belə yekunlaşdırıb:

"Bəzi hallarda "ortaq çevrə" faktoru da ayrılığa əngəl olur. Hesab edirlər ki, ayrılsalar, bütün bu ortaq münasibətlər də dəyişəcək. Bu isə əlavə qorxu yaradır. Amma unutmamalıyıq ki, münasibət daxilində nə qədər qorxu, bağlılıq və ümid olsa da, uyğun deyilsə və zərər verirsə, bu, insanı ümidsiz, yorğun və bitkin hala salır.

Ona görə də özümüzə bu sualları verməliyik: "Həqiqətən bu münasibətə bu qədər dözməyə dəyərmi?", "Ruhum, bədənim bu qədər əziyyəti niyə çəkməlidir?", "Sevgisizliklə yetinməyə niyə razı olmalıyam?". 

Nəzərə alın ki, sevgi diqqət, qayğı və hörmətdir. Sevgi və uyğunluq olmayan yerdə zorla uyğunlaşmaq mümkün deyil. İlk növbədə özümüzə dəyər verərək, münasibəti analiz etməli və doğru qərar verməliyik". 

Pərviz