Ruh sağlamlığı barədə danışmaq artıq zəiflik deyil, cəsarət sayılır. Hər bir insan həyatında müəyyən dövrlərdə stress, təşviş, yorğunluq və ya emosional tükənmə yaşayır. Amma çoxları belə hallarda sual edir: “Psixoloqa getmək mənim üçün düzgündürmü? Orada nə baş verəcək?” Cavab sadədir: psixoloqa müraciət etmək zəiflik deyil — öz həyatını daha yaxşı anlamaq və idarə etmək istəyidir.

İlk görüş – tanışlıq və etibar mərhələsi

İlk seans terapiyanın “müalicə” mərhələsi ilə başlamır. Psixoloq sizi dinləyir, həyat şəraitiniz, gündəlik vərdişləriniz, münasibətləriniz və hiss etdiyiniz gərginliklər barədə suallar verir. Bu mərhələdə məqsəd diaqnoz qoymaq deyil, sizin üçün təhlükəsiz və rahat danışıq mühiti yaratmaqdır. Psixoloq sizi tənqid etmir, məsləhət yağdırmır, hər şey etik qaydalar çərçivəsində gizli saxlanılır.

Problemin aydınlaşdırılması

Bir neçə seansdan sonra psixoloq sizin danışdıqlarınızı sistemləşdirir və əsas mövzunu müəyyənləşdirməyə kömək edir. Bəzən problem görünəndən fərqli olur: məsələn, “işdə stres” kimi başlayan mövzu, dərinlikdə “özünə inam çatışmazlığı” və ya uşaqlıq travmalarına qədər gedib çıxır. Psixoloqla birlikdə terapiyanın məqsədi müəyyənləşdirilir – bu, emosional tarazlıq qazanmaq, qərarvermə bacarığını gücləndirmək və ya sadəcə özünü daha aydın dərk etmək ola bilər.

Dəyişimin mərhələsi

Növbəti seanslarda psixoloq müxtəlif üsullardan istifadə edir: psixoloji testlər, metaforik kartlar, davranış təhlili və ya sadəcə yönləndirici suallar. Hər dəfə insan öz düşüncələrinə bir az da aydınlıq gətirir. Ən maraqlısı isə budur ki, psixoloq sizə cavab vermir – cavabı tapmağa kömək edir. Zamanla daxili gərginlik azalır, hadisələrə baxış dəyişir, emosional elastiklik artır. Bu, yavaş, amma dərin dəyişiklik prosesidir.

Seansların sonunda – nəticə və özünə inam

Terapiya bir gün bitir. Amma bu, “problemin bitməsi” deyil – artıq siz özünüzlə necə davranmağı öyrənmisiniz. Psixoloq sizi “düzəltmir”, sadəcə, özünüzü anlamaq və idarə etmək üçün ayna tutur.

Nəticə

Psixoloqa müraciət etmək zəiflik deyil – öz həyatının məsuliyyətini üzərinə almaqdır. Bəzən bir söhbət, bir sadə sual, bir səmimi baxış illərlə daşıdığınız yükü yüngülləşdirə bilər. Ruhun da bərpaya ehtiyacı var, bədən kimi. 

Özünə qayğı göstərmək, hisslərini anlamaq və idarə etməyi öyrənmək – ən böyük cəsarətdir.

Psixoloq: Lalə Natiq